சேலம் மாவட்டத்தில் கொட்டித்தீர்த்த கனமழை: வீடுகளுக்குள் புகுந்த தண்ணீரால் பரிதவித்த பொதுமக்கள்

சேலம்,

சேலம் மாவட்டத்தில் பல்வேறு இடங்களில் நேற்று முன்தினம் இரவு 9 மணி அளவில் இடி-மின்னலுடன் கனமழை பெய்தது. நள்ளிரவு வரை மழை கொட்டித்தீர்த்தது. இதனால் சாலைகளிலும், தாழ்வான பகுதிகளிலும் மழைநீர் பெருக்கெடுத்து ஓடியது. மேலும் சேலம் காந்தி விளையாட்டு மைதானத்தில் மழைநீர் தேங்கி குளம் போல் காட்சி அளித்தது. இதனால் காலையில் பள்ளி மாணவ, மாணவிகள் விளையாட்டு பயிற்சியில் ஈடுபட முடிய வில்லை. அதே போன்று நடைபயிற்சி செய்ய முடியாமல் ஆண்கள், பெண்கள் தவித்தனர்.

அரிசிபாளையம், தோப்பு காடு, சினிமா நகர், சத்திரம், சங்கர் நகர் உள்ளிட்ட பல இடங்களில் மழை நீர் தேங்கி நின்றது. மேலும் பல இடங்களில் மழைநீருடன் சாக்கடை கழிவுநீர் கலந்து பல்வேறு இடங்களில் வீடுகளுக்குள் புகுந்தது. இதனால் அந்த பகுதியில் வசிக்கும் பொது மக்கள் பெரும் அவதிப்பட்டனர். சேலத்தில் மேம்பாலம் கட்டும் இடங்களில் தண்ணீர் தேங்கியதால் வாகன ஓட்டிகள் கடும் அவதிப்பட்டனர். சேலம் பெரமனூர் கோவிந்தகவுண்டர் பகுதியில் வசிக்கும் தங்காயி (வயது 72), காந்தம்மாள் (70) ஆகிய 2 மூதாட்டிகளின் ஓட்டு வீடு இடிந்து விழுந்தது. அதிர்ஷ்டவசமாக யாருக்கும் எந்த பாதிப்பும் இல்லை. பெங்களூருவில் இருந்து சேலத்திற்கு வந்த கன்டெய்னர் லாரி நள்ளிரவு 2 மணி அளவில் கந்தம்பட்டி மேம்பாலம் அருகே பலத்த மழையால் டிரைவரின் கட்டுப்பாட்டை இழந்து திடீரென்று சாலை ஓரத்தில் உள்ள தடுப்புச்சுவரில் மோதி கவிழ்ந்தது. மேலும் சேலம் சத்திரம் பகுதியில் உள்ள அம்மா உணவகத்தையும் தண்ணீர் சூழ்ந்தது.

சேலம் அம்மாபேட்டையில் உள்ள குமரகிரி ஏரி நிரம்பியது. இதனால் ஏரியின் மதகுகள் வழியாக தண்ணீர் வெளியேற்றப்பட்டது. இந்த தண்ணீர் அருகில் உள்ள பச்சப்பட்டி பகுதியில் இருந்த ஏராளமான வீடுகளுக்குள் புகுந்தது. இதன் காரணமாக பொதுமக்கள் தூங்க முடியாமலும், சாப்பாடு, தண்ணீர் இன்றியும் பரிதவித்து வருகின்றனர். மேலும் அந்த பகுதி முழுவதும் மின் இணைப்பு துண்டிக்கப்பட்டு உள்ளது.





மேலும் பலத்த மழையால் செம்மாண்டப்பட்டியில் 10-க்கும் மேற்பட்ட வீடுகளில் தண்ணீர் புகுந்தது. பச்சனம்பட்டியில் விசைத்தறி கூடங்களில் தண்ணீர் புகுந்ததால், பொருட்கள் சேதம் அடைந்தன. வேங்கனூரில் உள்ள அரசு பள்ளி மைதானத்தில் 2 அடி உயரத்துக்கு தண்ணீர் தேங்கியது. முள்ளுசெட்டிபட்டியில் பூபதி என்பவருக்கு சொந்தமான மாட்டுக்கொட்டகை சரிந்ததால், கறவை மாடு பரிதாபமாக உயிரிழந்தது. செம்மாண்டப்பட்டி, தாராபுரம், தாத்தியம்பட்டி, பல்பாக்கி உள்பட பல்வேறு இடங்களில் 10-க்கும் மேற்பட்ட கிணறுகளின் சுற்றுச்சுவர் இடிந்து விழுந்தது. மேலும் ஓமலூர் பகுதியில் உள்ள தடுப்பணைகள் நிரம்பின. ஆறுகளிலும் தண்ணீர் பெருக்கெடுத்து ஓடுகிறது.

மேச்சேரி அருகே எம்.என்.பட்டி கோவிலூர் ரெயில்வே சுரங்கப்பாதையில் தண்ணீர் தேங்கியது. இதனால் அந்த பகுதியை கடக்க பொதுமக்கள் தண்ணீரில் பரிசலை இயக்கினார்கள். எடப்பாடி பகுதியில் பெய்த மழையின் காரணமாக பூலாம்பட்டி உள்பட பல்வேறு இடங்களில் விவசாய நிலங்களுக்குள் தண்ணீர் புகுந்தது. இதனால் பருத்தி, சோளம், நிலக்கடலை உள்பட விவசாய பயிர்கள் தண்ணீரில் மூழ்கின. குருக்கம்பட்டியில் இருந்து ஜலகண்டாபுரம் செல்லும் சாலையில் தண்ணீர் பெருக்கெடுத்து ஓடியதால் 10-க்கும் மேற்பட்ட வீடுகளை வெள்ளம் சூழ்ந்தது. இதனால் பொதுமக்கள் கடும் சிரமம் அடைந்தனர்.

சேலம் மாவட்டத்தில் நேற்று காலை நிலவரப்படி பதிவான மழை அளவு மில்லி மீட்டரில் வருமாறு:- மேட்டூர்-89.2, சேலம்-87.6, வாழப்பாடி-85, ஓமலூர்-83, ஆனைமடுவு-82, பெத்தநாயக்கன்பாளையம்-72, கெங்கவல்லி-58, எடப்பாடி-49.4, ஆத்தூர்-45.6, தம்மம்பட்டி-30.6, காடையாம்பட்டி-29.6, ஏற்காடு-29, கரியகோவில்-27, வீரகனூர்-19.2, சங்ககிரி-17.1.