சந்திரயான்-3 விக்ரம் லேண்டர் தரையிறக்கும் பணி எவ்வாறு நடைபெறும்? முழு விவரம்

சென்னை,

நிலவின் தென்துருவத்தை ஆய்வு செய்வதற்காக கடந்த ஜூலை 14 ஆம் தேதி பிற்பகல் 2:35 மணிக்கு 'சந்திரயான்-3' விண்கலம் விண்ணில் ஏவப்பட்டது. பின்னர் நிலவின் சுற்றுவட்டப்பாதையில் பயணித்த சந்திரயான் 3-ன் உயரம் படிப்படியாக குறைக்கப்பட்டது.

'சந்திரயான்-3' விண்கலத்தில் இருந்து பிரிந்து சென்ற 'விக்ரம் லேண்டர்' திட்டமிட்டபடி இன்று மாலை 6.04 மணிக்கு நிலவில் தரையிறங்கும் என இஸ்ரோ அறிவித்திருந்தது. லேண்டரை தரையிறக்கும் பணி இன்று மாலை 5.44 மணிக்கு தொடங்கும் என்றும் தெரிவித்துள்ளது.

இந்தியாவின் பெருமையாக கருதப்படும் இந்த நிகழ்வைக் காண உலகம் முழுவதும் உள்ள விண்வெளி ஆராய்ச்சியாளர்கள் பெரிதும் எதிர்பார்ப்புடன் காத்திருக்கின்றனர். 'சந்திரயான்-3'-ன் விக்ரம் லேண்டர் தரையிறங்கும் காட்சி இன்று மாலை 5.20 மணி முதல் இஸ்ரோவின் இணையதளம், இஸ்ரோ பேஸ்புக் பக்கம் மற்றும் அரசு தொலைக்காட்சி உள்ளிட்டவற்றில் நேரலையில் ஒளிபரப்பு செய்யப்படும் என அறிவிக்கப்பட்டுள்ளது.

தரையிறங்கும் பணி எவ்வாறு நடைபெறும் என்பதை பார்க்கலாம்:

தரையிறங்கும் பணியின் ஒரு பகுதியாக, லேண்டரின் என்ஜின்கள் எதிர் திசையில் சுழலும் வேகத்தை 1.6 கி.மீ/வினாடியில் இருந்து 358மீ/வினாடி ஆக குறைக்கும்.

கிடைமட்ட வேகம் குறையும் போது, லேண்டர் இறங்குகிறது. 690-வினாடி கடினமான கட்டத்திற்குப் பிறகு, லேண்டர் நிலவின் மேற்பரப்பில் இருந்து ஏழரை கிலோமீட்டர் உயரத்தை எட்டும்.

அப்போது கிடைமட்ட வேகம் வினாடிக்கு 358 மீட்டராகவும், கீழ்நோக்கிய வேகம் வினாடிக்கு 61 மீட்டராகவும் இருக்கும்.

இங்கிருந்து இரண்டாம் கட்டம் தொடங்கும்... பத்து வினாடிகள் நீடிக்கும் இந்த கட்டத்தில் வேகத்தில் குறிப்பிடத்தக்க மாற்றம் இருக்காது. ஆனால் லேண்டரின் திசை மாறுகிறது… அதுவரை நிலவின் மேற்பரப்புக்கு இணையாக இருந்த லேண்டர், 50 டிகிரி சாய்ந்துவிடும்... இந்த கட்டத்தில் லேண்டரின் கால்கள் நேராக கீழே கொண்டு வரப்பட்டு, தரையிறங்கும் இடத்தில் இருந்து ஒரு கிலோ மீட்டருக்கு மேலே பத்து வினாடிகள் வட்டமிட்டு, தரையிறங்க வேண்டிய பகுதியை ஆய்வு செய்யும். பின்னர் வினாடிக்கு ஒன்றரை மீட்டர் வேகத்தில் மிக மெதுவாக இறங்கத் தொடங்குகிறது...

தரையிறங்கும் இடத்தில் 150 மீட்டர் உயரத்தில், லேண்டர் மீண்டும் 20 வினாடிகள் வட்டமிட்டு, தரையிறங்க வேண்டிய பகுதியை கவனமாக ஆய்வு செய்யும். அங்கு ஏதேனும் தடைகள், குழிகள் காணப்பட்டால், 150 மீட்டருக்குள் வேறு பாதுகாப்பான இடத்தைக் கண்டுபிடித்து லேண்டர் அங்கு நகரும். இல்லையென்றால், முதல் இடம் பாதுகாப்பாக இருந்தால், அடுத்த பத்து வினாடிகளில், லேண்டர் ஒரு மீட்டர் வீதம் தரையைத் தொடும்.

சூரியன் உதித்தவுடன், லேண்டரின் கதவு திறக்கும் மற்றும் ஒரு சாய்வு கீழே வரும்… அதன் மூலம் இருபத்தி ஆறு கிலோ எடையுள்ள ஆறு சக்கர ரோவர் பிரக்யான் வெளியே வரும்... அதன் பிறகு, ரோவரில் உள்ள கேமராக்கள் திறக்கப்பட்டு, லேண்டர் மற்றும் நிலவின் மேற்பரப்பு படங்கள் பூமிக்கு அனுப்பப்படும்.