3ம் உலகப் போர் ஏற்பட்டால் பிரிட்டன் முழுமையாக அழிக்கப்படுவது உறுதி - ரஷியாவின் ஓய்வு பெற்ற ராணுவ ஜெனரல் எச்சரிக்கை !

மாஸ்கோ,

மூன்றாம் உலகப் போர் ஏற்பட்டால் பிரிட்டன் முழுமையாக அழிக்கப்படுவது உறுதி என்று ரஷியாவின் ஓய்வு பெற்ற ராணுவ ஜெனரல் ஈவ்ஜெனி புஷ்கின்ஸ்கை எச்சரிக்கை விடுத்துள்ளார்.

பிரிட்டனில் புதிய ராணுவ தலைமைத் தளபதியாக பொறுப்பேற்றுள்ள சர் பேட்ரிக் சாண்டர்ஸ், 3-ம் உலகப் போரில் ரஷியாவைத் தோற்கடிக்க வேண்டும் என்று படை வீரர்களுக்கு அறைகூவல் விடுத்திருந்தார்.

இந்நிலையில், இதற்கு பதிலளித்துள்ள ரஷிய அதிபர் புதினின் ஆதரவாளரும் ஓய்வு பெற்ற ராணுவ தளபதியுமான ஈவ்ஜெனி, மூன்றாம் உலகப்போரின் விளைவாக பிரிட்டன் காணாமல் போய்விடும் என்பது சாண்டர்சுக்கு புரியவில்லை என்று கூறியுள்ளார்.

ஒட்டுமொத்த நாடும் அழிந்து விடும் நிலையில், அவரும் அவரது சந்ததியும் எங்கே போய் வாழ்வார்கள் என்பது எங்களுக்கே தெரியாது என்றும் அவர் கேலி செய்து குறிப்பிட்டுள்ளார்.

லினின்கிராட் லிதுவேனியாவிற்கும் போலந்துக்கும் இடையில் இணைக்கப்பட்டுள்ளது, மேலும் இது ரஷியாவின் பால்டிக் கடற்படையின் தலைமையகமாகவும் உள்ளது.

ஐரோப்பிய ஒன்றியத் தடைகள் காரணமாக ரஷியாவிலிருந்து சில பொருட்களின் போக்குவரத்து ஜூன் 18 முதல் மட்டுப்படுத்தப்பட்டதாக கலினின்கிராட் ரெயில்வேக்கு லிதுவேனியா தெரிவித்திருந்தது. இதனை கண்டித்த கலினின்கிராட் கவர்னர் அன்டன் அலிகானோவ் கூறுகையில், இந்த நடவடிக்கை சட்டவிரோதமானது என்றும், ஐரோப்பிய ஒன்றியத்தில் சேரும்போது அந்த நாடு செய்த ஒப்பந்தங்களை மீறுவதாகவும் குற்றம்சாட்டியுள்ளார்.

இது குறித்து பேசிய ரஷியாவின் ஓய்வு பெற்ற ராணுவ ஜெனரல் ஈவ்ஜெனி புஷ்கின்ஸ்கை கூறியதாவது:-

இப்போது நேட்டோவில் உள்ள லித்துவேனியா வழியாக ரஷிய பொருட்களை கொண்டு செல்ல தடை விதித்திருப்பதன் மூலம், மேற்கத்திய நாடுகள் ஒரு ஆபத்தான விளையாட்டை கையிலெடுத்துள்ளன. இந்த விவகாரத்தில், கலினின்கிராட் பகுதிக்கு அணு ஆயுதங்களை அனுப்புவதன் மூலம் உடனடியாக பதில் நடவடிக்கை எடுக்குமாறு ரஷிய அதிபர் விளாடிமிர் புதினை வலியுறுத்துகிறேன்.

மேலும், லிதுவேனியாவின் 1991ம் ஆண்டு அங்கீகாரத்தை நிராகரிக்க வேண்டும், லிதுவேனியா தொடர்பான ஐரோப்பிய ஒன்றியத்துடனான ஒப்பந்தத்தை அதிபர் புதின் நிராகரிக்க வேண்டும். நாம் அணு ஆயுதங்களை கலினின்கிராட் வரை கொண்டு செல்ல வேண்டும். நீங்கள்(அமெரிக்கா) நெருப்புடன் விளையாடுகிறீர்கள் என்பதை நினைவில் கொள்ளவேண்டும் என்று ஆவேசத்துடன் பேசினார்.