சீன சுற்றுலா பயணிகளுக்கு விசா தேவையில்லை - தாய்லாந்து அறிவிப்பு

பாங்காங்,

தாய்லாந்து நாட்டின் பொருளாதாரத்தில் சுற்றுலாத்துறை மிக முக்கிய பங்கு வகிக்கிறது. குறிப்பாக அதன் அண்டை நாடான சீனாவில் இருந்து தாய்லாந்துக்கு ஆண்டுதோறும் ஏராளமான சுற்றுலா பயணிகள் வருவார்கள். கடந்த 2019-ம் ஆண்டு நிலவரப்படி சீனாவில் இருந்து மட்டும் 1 கோடிக்கும் அதிகமான சுற்றுலா பயணிகள் வந்து சென்றனர்.

ஆனால் கொரோனா தொற்றுக்கு பின்னர் இந்த எண்ணிக்கை பல மடங்கு குறைந்தது. தற்போது இயல்பு நிலை திரும்பியதால் படிப்படியாக இந்த எண்ணிக்கை அதிகரித்து வருகிறது. எனினும் கடுமையான விசா கட்டுப்பாடுகளால் கடந்த 6 மாதங்களில் இதுவரை 14 லட்சம் சுற்றுலா பயணிகள் மட்டுமே சீனாவில் இருந்து வந்துள்ளனர்.

எனவே சுற்றுலா துறையை மீட்டெடுக்க அரசாங்கம் பல்வேறு நடவடிக்கை எடுத்து வருகிறது. அதன்படி வருகிற 25-ந்தேதி முதல் அடுத்த ஆண்டு பிப்ரவரி மாதம் 29-ந்தேதி வரை சீனாவில் இருந்து சுற்றுலா வருபவர்களுக்கு விசா பெறுவதில் இருந்து விலக்கு அளிக்கப்படுவதாக தாய்லாந்து பிரதமர் ஸ்ரேத்தா தவிசின் அறிவித்தார். மேலும் கஜகஸ்தான் நாட்டு சுற்றுலா பயணிகளுக்கும் இந்த உத்தரவு பொருந்தும் என தாய்லாந்து சுற்றுலா துறை தெரிவித்துள்ளது.