உலகக்கோப்பையை வென்றது குறித்து ஆஸ்திரேலிய அணியின் கேப்டன் கம்மின்ஸ் நெகிழ்ச்சி!

சிட்னி,

13-வது உலகக்கோப்பை கிரிக்கெட் தொடர் கடந்த மாதம் 5-ந்தேதி இந்தியாவில் தொடங்கியது. 10 அணிகள் பங்கேற்ற இந்த கிரிக்கெட் திருவிழாவில் லீக் மற்றும் அரைஇறுதி முடிவில் இந்தியா- ஆஸ்திரேலியா இறுதிப்போட்டிக்கு முன்னேறின. இறுதிப்போட்டியில் இந்திய அணியை வீழ்த்தி பேட் கம்மின்ஸ் தலைமையிலான ஆஸ்திரேலியா சாம்பியன் பட்டம் வென்றது.

இந்நிலையில் உலகக்கோப்பையை வென்றது குறித்து பேட் கம்மின்ஸ் ஆஸ்திரேலியாவில் நடைபெற்ற ஒரு நிகழ்ச்சியில் பேசுகையில், ' நான் இன்னும் மகிழ்ச்சியின் உச்சத்தில் இருக்கிறேன். நாங்கள் நடந்து செல்லும்போது மக்கள் அனைவரும் உலகக்கோப்பை குறித்தே பேசுகின்றனர். தினமும் காலையில் விழிக்கும்போது உற்சாகத்துடன் இருக்கிறேன். வெற்றியின்போது நீங்கள் நிறைய கற்றுக்கொள்வீர்கள். ஆனால் தோல்வி அடையும்போது அதைவிட அதிகம் கற்றுக்கொள்வீர்கள்' என்று கூறினார்.