மெர்டேக்கா கால்பந்து தொடர்; அரையிறுதியில் இந்திய அணி தோல்வி..!

கோலாலம்பூர்,

42-வது மெர்டேக்கா கால்பந்து தொடர் மலேசியா தலைநகர் கோலாலம்பூரில் நடைபெறுகிறது. இந்த தொடரில் முதலில் மலேசியா, இந்தியா, பாலஸ்தீனம் மற்றும் தஜிகிஸ்தான் ஆகிய 4 அணிகள் இடம் பெற்றிருந்தன. இதில் தொடரில் இருந்து கடைசி நேரத்தில் பாலஸ்தீனம் விலகியது.

பாலஸ்தீனம் விலகிய நிலையில், மலேசியா கால்பந்து சங்கம், இந்த தொடர் இந்தியா, தஜிகிஸ்தான் மற்றும் மலேசியா ஆகிய மூன்று அணிகளுடன் நாக்-அவுட் முறையில் நடைபெறும் என்று அறிவித்து இருந்தது.

அதன்படி நடைபெற்ற அரையிறுதியில் இந்தியா மற்றும் மலேசியா அணிகள் மோதின. இதில் மலேசியா 4-2 என்ற கோல் கணக்கில் இந்திய அணியை வீழ்த்தி வெற்றி பெற்றது. இந்த வெற்றியின் மூலம் வரும் 17ஆம் தேதி நடைபெற உள்ள இறுதிப்போட்டிக்கு மலேசிய அணி தகுதி பெற்றுள்ளது.

இறுதிப்போட்டியில் மலேசியா மற்றும் தஜிகிஸ்தான் அணிகள் பலப்பரீட்சை நடத்த உள்ளன.