மான்ட்ரியல்,

இதன் 7–வது சுற்றான கனடா கிரான்ட்பிரி பந்தயம், மான்ட்ரியல் ஓடுதளத்தில் நேற்று முன்தினம் நடந்தது. பந்தய தூரமான 305.27 கிலோ மீட்டர் தூரத்தை நோக்கி 10 அணிகளை சேர்ந்த 20 வீரர்கள் காரில் சீறிப்பாய்ந்தனர். இதில் 3 முறை சாம்பியனான இங்கிலாந்து வீரர் லீவிஸ் ஹாமில்டன் (மெர்சிடஸ் அணி) பந்தய தூரத்தை 1 மணி 33 நிமிடம் 05.154 வினாடியில் கடந்து முதலிடத்தை பிடித்தார். முதலிடம் பிடித்த அவருக்கு 25 புள்ளிகள் கிடைத்தன. ஒட்டுமொத்தத்தில் ஹாமில்டன் பெற்ற 56–வது வெற்றி இதுவாகும். கனடா கிராண்ட்பிரி பந்தயத்தில் அவர் பெற்ற 6–வது வெற்றி இது என்பது குறிப்பிடத்தக்கது. பின்லாந்து வீரர் வால்ட்டெரி பாட்டஸ் (மெர்சிடஸ்) 19.783 வினாடிகள் பின்தங்கி 2–வது இடத்தை பெற்றார். ஆஸ்திரேலிய வீரர் டேனியல் ரிச்சர்டோ (ரெட்புல்) 3–வது இடம் பிடித்தார். 4 முறை சாம்பியனான ஜெர்மனி வீரர் செபாஸ்டியன் வெட்டல் (பெராரீ) 4–வது இடத்துக்கு தள்ளப்பட்டார்.

போர்ஸ் இந்தியா அணிக்காக பங்கேற்று வரும் செர்ஜியோ பெரேஸ் (மெக்சிகோ), ஈஸ்ட்பான் ஒகான் (பிரான்ஸ்) முறையே 5–வது, 6–வது இடங்களை பெற்றனர். 7 சுற்றுகள் முடிவில் செபாஸ்டியன் வெட்டல் 149 புள்ளிகளுடன் முதலிடத்திலும், லீவிஸ் ஹாமில்டன் 129 புள்ளிகளுடன் 2–வது இடத்திலும் உள்ளனர். 8–வது சுற்று போட்டி அஜர்பைஜானில் வருகிற 25–ந் தேதி நடக்கிறது.