மாவட்ட கைப்பந்து போட்டி: டாக்டர் சிவந்தி கிளப் இறுதிப்போட்டிக்கு தகுதி

சென்னை,

சென்னை மாவட்ட கைப்பந்து சங்கம் சார்பில் மாவட்ட 'பி' டிவிசன் ஆண்கள் கைப்பந்து மற்றும் பெண்களுக்கான கைப்பந்து சாம்பியன்ஷிப் போட்டி எழும்பூரில் உள்ள மேயர் ராதாகிருஷ்ணன் ஸ்டேடியத்தில் நடந்து வருகிறது. இதில் 2-வது நாளான நேற்று நடந்த பெண்களுக்கான அரைஇறுதி ஆட்டம் ஒன்றில் எஸ்.டி.ஏ.டி. அணி 25-14, 23-25, 25-17 என்ற செட் கணக்கில் டாக்டர் சிவந்தி பவுண்டேசனை வீழ்த்தி இறுதிப்போட்டிக்குள் நுழைந்தது.

மற்றொரு அரைஇறுதியில் டாக்டர் சிவந்தி கிளப் 25-15, 25-10 என்ற நேர்செட்டில் எம்.ஓ.பி.வைஷ்ணவா கல்லூரியை தோற்கடித்து இறுதிப்போட்டிக்கு முன்னேறியது. இன்று மாலை 5 மணிக்கு நடைபெறும் இறுதிப்போட்டியில் டாக்டர் சிவந்தி கிளப்-எஸ்.டி.ஏ.டி. அணிகள் பலப்பரீட்சை நடத்துகின்றன. முன்னதாக நடைபெறும் 3-வது இடத்துக்கான ஆட்டத்தில் டாக்டர் சிவந்தி பவுண்டேசன்-எம்.ஓ.பி.வைஷ்ணவா அணிகள் சந்திக்கின்றன.

ஆண்கள் பிரிவில் நடந்த கால்இறுதி ஆட்டம் ஒன்றில் அக்னி பிரண்ட்ஸ் கிளப் 15-25, 25-17, 25-19, 25-20 என்ற செட் கணக்கில் ஸ்டேட் வங்கியை விரட்டியடித்து அரைஇறுதிக்கு முன்னேறியது. மற்றொரு கால்இறுதியில் ஜி.எஸ்.டி. அணி 25-22, 25-18, 25-18 என்ற நேர்செட்டில் நேதாஜி கிளப்பை தோற்கடித்து அரைஇறுதியை எட்டியது.