புதுடெல்லி,

பேட்மிண்டன் வீரர், வீராங்கனைகளின் புதிய தரவரிசை பட்டியலை உலக பேட்மிண்டன் சம்மேளனம் நேற்று வெளியிட்டது. இதன்படி ஆண்கள் இரட்டையர் பிரிவில் இந்தியாவின் சாத்விக் சாய்ராஜ் ரங்கி ரெட்டி-சிராக் ஷெட்டி (87,211 புள்ளிகள்) இணை 3-வது இடத்தில் இருந்து 2-வது இடத்துக்கு முன்னேறி இருக்கிறது. சாத்விக்-சிராக் ஜோடியின் சிறந்த தரநிலை இதுவாகும். கடந்த வாரம் கொரியா ஓபன் அரைஇறுதியில் தரவரிசையில் 2-வது இடத்தில் இருந்த லியாங் வெய் கெங்-வாங் சாங் இணையை வீழ்த்திய சாத்விக்-சிராக் கூட்டணி இறுதிப்போட்டியில் நம்பர் ஒன் இணைக்கு அதிர்ச்சி அளித்து சாம்பியன் பட்டம் வென்றதுடன் தொடர்ச்சியாக 10-வது வெற்றியை சுவைத்தது. இதன் மூலம் இந்திய ஜோடி ஒரு இடம் ஏற்றம் கண்டுள்ளது. இறுதிப்போட்டியில் இந்திய இணையிடம் தோற்ற இந்தோனேசியாவின் பஜர் அல்பியான்-முகமது ரியான் அட்ரியான்டோ ஜோடி (91,929 புள்ளிகள்) முதலிடத்தில் நீடிக்கிறது.

ஆண்கள் ஒற்றையர் பிரிவில் ஒலிம்பிக் சாம்பியனான டென்மார்க் வீரர் விக்டர் ஆக்சல்சென் முதலிடத்தில் தொடருகிறார். இந்திய வீரர்களில் எச்.எஸ்.பிரனாய் 10-வது இடத்தை தக்கவைத்துள்ளார். கனடா ஓபனை வென்றதுடன் கொரியா ஓபன் போட்டியில் இருந்து விலகிய இந்திய இளம் வீரர் லக்ஷயா சென் ஒரு இடம் சறுக்கி 13-வது இடம் பெற்றுள்ளார். மற்றொரு இந்திய வீரர் ஸ்ரீகாந்த் 20-வது இடத்தில் மாற்றமின்றி நீடிக்கிறார்.

பெண்கள் ஒற்றையர் பிரிவில் ஜப்பானின் அகானே யமாகுச்சி நம்பர் ஒன் இடத்தில் தொடருகிறார். இந்திய வீராங்கனைகள் பி.வி.சிந்து 17-வது இடத்திலும், சாய்னா நேவால் ஒரு இடம் சரிந்து 37-வது இடத்திலும் உள்ளனர்.