திருச்சானூர் பத்மாவதி தாயார் கோவில் மற்றும் துணைக் கோவில்களில் இந்த மாதம் (டிசம்பர்) நடக்கும் சிறப்பு உற்சவங்களை திருமலை திருப்பதி தேவஸ்தானம் வெளியிட்டுள்ளது. அதன் விவரம் வருமாறு:

பத்மாவதி தாயார் கோவில்

வருகிற 5, 12, 19 மற்றும் 26-ந்தேதிகளில் வரும் வெள்ளிக்கிழமைகளில் பத்மாவதி தாயாருக்கு ‘திருச்சி உற்சவம்' நடக்கிறது. 22-ந்தேதி உத்திராடம் நட்சத்திரத்தை முன்னிட்டு மாலை 6.45 மணிக்கு உற்சவர் பத்மாவதி தாயார் கஜ வாகனத்தில் எழுந்தருளி கோவிலின் நான்கு மாடவீதிகளில் உலா வந்து பக்தர்களுக்கு அருள்பாலிக்கிறார். 30-ந்தேதி வைகுண்ட ஏகாதசி விழா, 31-ந்தேதி வைகுண்ட துவாதசி விழா நடக்கிறது.

திருச்சானூரில் உள்ள பலராம கிருஷ்ணர் கோவிலில் 5-ந்தேதி ரோகிணி நட்சத்திரத்தை முன்னிட்டு ருக்மினி, சத்யபாமா சமேத ஸ்ரீகிருஷ்ணர் திருச்சி வாகனத்தில் எழுந்தருளி கோவிலின் நான்கு மாடவீதிகளில் உலா வந்து பக்தர்களுக்கு அருள் பாலிக்கிறார்.

சூரியநாராயண சுவாமி கோவில்

திருச்சானூர் சூரியநாராயண சுவாமி கோவிலில் 14-ந்தேதி அஸ்த நட்சத்திரத்தை முன்னிட்டு சூரியநாராயண சுவாமி திருச்சி வாகனத்தில் எழுந்தருளி கோவிலின் நான்கு மாடவீதிகளில் உலா வந்து பக்தர்களுக்கு அருள் பாலிக்கிறார்.

திருச்சானூர் சுந்தரராஜ சுவாமி கோவிலில் 7-ந்தேதி உத்திரட்டாதி நட்சத்திரத்தை முன்னிட்டு சுந்தரராஜசுவாமி திருச்சி வாகனத்தில் எழுந்தருளி கோவிலின் நான்கு மாடவீதிகளில் உலா வந்து பக்தர்களுக்கு அருள் பாலிக்கிறார்.

திருச்சானூர் சீனிவாசசுவாமி கோவிலில் 6, 13, 20 மற்றும் 27-ந்தேதி வியாழக்கிழமைகளில் காலை 8 மணிக்கு மூலவர் சீனிவாசசுவாமிக்கு சிறப்பு அபிஷேகம் நடக்கிறது.