இந்து முன்னணி நெல்லை கோட்ட செயலாளர் கண்ணன் மற்றும் நிர்வாகிகள் நாகர்கோவிலில் உள்ள மாவட்ட போலீஸ் சூப்பிரண்டு அலுவலகத்தில் நேற்று ஒரு மனு அளித்தனர். அந்த மனுவில் அவர்கள் கூறியிருப்பதாவது:-

விநாயகர் சதுர்த்தி விழாவை முன்னிட்டு குமரி மாவட்ட இந்து முன்னணி சார்பில் மாவட்டம் முழுவதும் 5,004 விநாயகர் சிலைகளை இந்து கிராம கோவில்களிலும், பொது இடங்களிலும், வீடுகளிலும் அகஸ்ட் மாதம் 27-ந்தேதி முதல் 30, 31-ந் தேதி (சனி, ஞாயிற்றுக்கிழமை) வரை பூஜையில் வைத்து பின்னர் கடலிலும், ஆறுகளிலும், நீர்நிலைகள் மற்றும் அருவிகளில் வழக்கம்போல் கரைக்க உள்ளோம்.

30-ந் தேதி மணவாளக்குறிச்சி யானை வரவழைத்த பிள்ளையார் கோவில் முன்பு காலை 8.30 மணிக்கு ஊர்வலம் தொடங்கி மாலை 5.30 மணிக்கு சின்னவிளை கடலில் சிலைகள் கரைக்கப்படும். 31-ந் தேதி ராஜாக்கமங்கலம் ஒன்றியத்தில் நாகர்கோவில் நாகராஜா திடலில் இருந்து மதியம் 2.30 மணிக்கு ஊர்வலம் தொடங்கி, மாலை 6 மணிக்கு சங்குத்துறை கடலில் சிலைகள் கரைப்பு நடைபெறும். தோவாளை ஒன்றியத்தில் தோவாளை சுப்பிரமணிய சுவாமி கோவில் அடிவாரத்தில் இருந்து பிற்பகல் 3 மணிக்கு தொடங்கி மாலை 6 மணிக்கு ஞாலம் பள்ளிகொண்டான் தடுப்புஅணையில் சிலைகள் கரைக்கப்படும்.

அகஸ்தீஸ்வரம் ஒன்றியத்தில் சுசீந்திரம் தாணுமாலயசுவாமி கோவில் முன்பிருந்து பிற்பகல் 3 மணிக்கு ஊர்வலம் தொடங்கி மாலை 6 மணிக்கு கன்னியாகுமரி முக்கடல் சங்கமத்தில் சிலைகள் கரைப்பு நடைபெறும். குருந்தன்கோடு ஒன்றியம் மற்றும் குளச்சல் நகரம் சார்பில் திங்கள்சந்தை ராதாகிருஷ்ணன் கோவில் முன்பிருந்து காலை 9 மணிக்கு ஊர்வலம் தொடங்கி மதியம் 12 மணிக்கு மண்டைக்காடு கடலில் சிலைகள் கரைக்கப்படும்.

தக்கலை ஒன்றியம்- பத்மநாபபுரம் நகரம் சார்பில் வைகுண்டபுரம் ஸ்ரீராமர் கோவிலில் இருந்து மதியம் 12 மணிக்கு ஊர்வலம் தொடங்கி மாலை 5 மணிக்கு மண்டைக்காடு கடலில் சிலைகள் கரைக்கப்படும். திருவட்டார் ஒன்றியம் சார்பில் செருப்பாலூர் முத்தாரம்மன் கோவிலில் இருந்து காலை 10 மணிக்கு ஊர்வலம் தொடங்கி மதியம் 1 மணிக்கு திற்பரப்பு அருவியில் சிலைகள் கரைப்பு நடைபெறும். கிள்ளியூர் ஒன்றியம் சார்பில் கருங்கல் கூனாலுமூடு தர்மசாஸ்தா கோவிலில் இருந்து காலை 10 மணிக்கு ஊர்வலம் தொடங்கி மாலை 4 மணிக்கு மிடாலம் கடலில் சிலைகள் கரைக்கப்படும்.

முன்சிறை ஒன்றியம் கொல்லங்கோடு நகரம் சார்பில் அஞ்சுகண்ணுகலுங்கு மாடன் தர்மபுரான் இசக்கி அம்மன் கோவிலில் இருந்து மதியம் 2 மணிக்கு ஊர்வலம் தொடங்கி மாலை 5 மணிக்கு தேங்காப்பட்டணம் கடலில் சிலைகள் கரைப்பு நடைபெறும். மேல்புறம் ஒன்றியம் மேல்புறம் அளப்பன்கோடு ஈஸ்வரன் கால பூதத்தான் கோவிலில் இருந்து காலை 10 மணிக்கு ஊர்வலம் தொடங்கி மதியம் 1 மணிக்கு குழித்துறை தாமிரபரணி ஆற்றில் சிலைகள் கரைப்பு நடைபெறும். குழித்துறை நகரம் சார்பில் பம்மம் பகுதியில் இருந்து காலை 10 மணிக்கு ஊர்வலம் தொடங்கி மதியம் 1 மணிக்கு குழித்துறை தாமிரபரணி ஆற்றில் சிலைகள் கரைப்பு நடைபெறும்.

இவ்வாறு அதில் கூறப்பட்டுள்ளது.