சென்னை,
தங்கம் விலை கடந்த ஆண்டு (2024) உயர்ந்து கொண்டே வந்து, ஆண்டின் இறுதியில் சற்று விலை குறைந்து காணப்பட்டது. இதனைத்தொடர்ந்து இந்த ஆண்டின் தொடக்கத்தில் இருந்து அதன் விலை மீண்டும் ஏறுமுகத்தில் இருந்து வருகிறது. கடந்த மாதம் (ஜனவரி) 22-ந்தேதி ஒரு சவரன் ரூ.60 ஆயிரத்தை கடந்த நிலையில், தொடர்ந்து விலை அதிகரித்து கொண்டே வந்து, கடந்த 5-ந்தேதி ஒரு சவரன் ரூ.63 ஆயிரத்தை தாண்டி புதிய உச்சத்தை பதிவு செய்தது.
இதன் தொடர்ச்சியாக நேற்றும் தங்கம் விலை உயர்ந்தது. நேற்றைய நிலவரப்படி, கிராமுக்கு ரூ.80-ம், சவரனுக்கு ரூ.640-ம் அதிகரித்து, ஒரு கிராம் ரூ.8,060-க்கும், ஒரு சவரன் ரூ.64,480-க்கும் விற்பனை ஆனது. இதன் மூலம் தங்கம் விலை இதுவரை இல்லாத வரலாறு காணாத புதிய உச்சத்தை தொட்டது. கடந்த 20 நாட்களில் மட்டும் தங்கம் விலை கிராமுக்கு ரூ.535-ம், சவரனுக்கு ரூ.4,280-ம் அதிகரித்துள்ளது குறிப்பிடத்தக்கது.
இந்த நிலையில் தொடர்ந்து ஏறுமுகத்தில் இருந்து வந்த தங்கம் விலை இன்று அதிரடியாக குறைந்துள்ளது. அதன்படி சென்னையில் 22 கேரட் ஆபரணத் தங்கத்தின் விலை சவரனுக்கு ரூ.960 குறைந்து ரூ.63,520-க்கு விற்பனை செய்யப்படுகிறது. தங்கம் விலை கிராமுக்கு ரூ.120 குறைந்து ரூ.7,940-க்கு விற்பனை செய்யப்படுகிறது. வெள்ளி விலையை பொறுத்தவரையில், தொடர்ந்து 7-வது நாளாக இன்றும் மாற்றம் இல்லாமல், ஒரு கிராம் ரூ.107-க்கும், ஒரு கிலோ ரூ.1 லட்சத்து 7 ஆயிரத்துக்கும் விற்பனை செய்யப்படுகிறது.
