சேலத்தில் நடைபெற்ற விழாவில் புதிய பணிகளுக்கு அடிக்கல் நாட்டி, நலத்திட்ட உதவிகளையும் முதல்-அமைச்சர் மு.க.ஸ்டாலின் வழங்கினார்.

இதையடுத்து நிகழ்வில் பேசிய அவர், "நெல் கொள்முதல் விலை சாதாரண ரகத்திற்கு ரூ.131, சன்ன ரகத்திற்கு ரூ. 156 உயர்த்தப்படுகிறது. இனி சாதாரண ரகத்திற்கு (குவிண்டால்) ரூ.2,500, சன்ன ரகத்திற்கு ரூ.2,545 கிடைக்கும். இதனால் 10 லட்சத்திற்கும் மேற்பட்ட விவசாயிகள் பயனடைவார்கள்.

சேலத்தின் வளர்ச்சிக்கு அயராது உழைப்பவர் மாவட்ட ஆட்சியர் பிருந்தா தேவி. தமிழகத்தில் சிறப்பாக செயல்படும் கலெக்டர்களில் ஒருவர். சேலத்திற்கு தி.மு.க அரசு பல்வேறு திட்டங்களை செயல்படுத்தி உள்ளது. சேலத்தில் 9 உழவர் சந்தைகள் ஏற்படுத்தப்பட்டுள்ளன. சேலத்தில் ரூ.548 கோடி மதிப்பீட்டில் பாதாள சாக்கடை பணிகள் நிறைவேற்றப்பட்டுள்ளன. கடந்த 4 ஆண்டுகளில் சேலத்திற்கு ரூ.7600 கோடியில் திட்டங்கள் செயல்படுத்தப்பட்டுள்ளன. சேலம் மாவட்டத்தில் மட்டும 56 கோவில்களுக்கு குடமுழுக்கு நடத்தப்பட்டுள்ளது.

சேலம் மாவட்டத்திற்கு புதிய அறிவிப்புகள்

* சேலத்தில் ரூ.100 கோடி மதிப்பீட்டில் சாலைகள் சீரமைக்கப்படும்.

* சேலம் செவ்வாப்பேட்டை தினசரி சந்தை ரூ.9 கோடி மதிப்பீட்டில் மேம்படுத்தப்படும்.

* சங்ககிரி நகராட்சியில் புதிய வணிக வளாகம் கட்டப்படும். மேட்டூர் நரசிங்கபுரத்தில் புதிய நகராட்சி கட்டடங்கள் கட்டப்படும்.

* ஆத்தூரில் ரூ.5 கோடியில் புதிய குடிநீர் திட்டப்பணிகள் மேற்கொள்ளப்படும்.

* தாரமங்கலம், எடப்பாடி, ஆத்தூர் பகுதிகளில் புதிய குடிநீர்திட்டப்பணிகள் மேற்கொள்ளப்படும்.

* தலைவாசல் இழுப்பநத்தம் வேளாண் விற்பனை மையம் ரூ.10 கோடியில் தரம் உயர்த்தப்படும்" என்று முதல்-அமைச்சர் மு.க.ஸ்டாலின் கூறினார்.

தொடர்ந்து பேசிய அவர், "மத்திய அமைச்சர் அமித்ஷா மதுரை வந்த போது தனது ஆத்திரத்தை கொட்டித் தீர்த்துள்ளார். மதுரை வந்த அமித்ஷா அங்கு கட்டப்பட்டு வரும் எய்ம்ஸ் மருத்துவமனையை நேரில் போய் பார்த்தாரா?.. 10 ஆண்டுகளாக கட்டி வருவதற்கு மதுரை எய்ம்ஸ் என்ன விண்வெளி ஆராய்ச்சி நிலையமா?

முறையாக நிதியை ஒதுக்கி இருந்தால் மதுரையில் 2 ஆண்டுகளில் எய்ம்ஸ் மருத்துவமனை கட்டி இருக்கலாம்" என்று மு.க.ஸ்டாலின் கூறினார்.