வங்கக்கடலில் நிலைகொண்டிருந்த ஆழ்ந்த காற்றழுத்த தாழுவு பகுதி புயலாக உருவானது. இந்த புயலுக்கு டிட்வா என பெயரிடப்பட்டுள்ளது. டிட்வா புயலால் தமிழகத்தின் பல்வேறு மாவட்டங்களில் கனமழை பெய்து வருகிறது. மேலும், கனமழையால் விவசாய நிலங்கள் பாதிகப்பட்டுள்ளன.

இந்நிலையில், டிட்வா புயலால் 3 பேர் உயிரிழந்துள்ளதாக தமிழக அரசு தெரிவித்துள்ளது. இது தொடர்பாக தமிழக வருவாய் மற்றும் பேரிடர் மேலாண்மை துறை அமைச்சர் கேகேஎஸ்எஸ்ஆர் ராமச்சந்திரன் இன்று சென்னையில் செய்தியாளர்களை சந்தித்தார். அப்போது அவர் கூறுகையில்,

தமிழகத்தில் டிட்வா புயல் , மழை தொடர்பான சம்பவங்களில் 3 பேர் உயிரிழந்துள்ளனர். தூத்துக்குடியில் ஒருவரும், தஞ்சாவூரில் ஒருவரும் சுவர் இடிந்து விழுந்து உயிரிழந்தனர். மயிலாடுதுறையில் மின்சாரம் தாக்கி ஒருவர் உயிரிழந்தார். இதன் மூலம் டிட்வா புயலால் தமிழகத்தில் 3 பேர் உயிரிழந்தனர். மேலும், 149 கால்நடைகளும் உயிரிழந்தன. டிட்வா புயலால் 57 ஆயிரம் ஹேக்டேர் விவசாய நிலங்கள் பாதிக்கப்பட்டுள்ளது

என்றார்.