மும்பை,

இந்திய அணியின் முன்னாள் சுழற்பந்து வீச்சாளர்களான ஹர்பஜன் சிங் - ரவிச்சந்திரன் அஸ்வின் இடையே பிரச்சினை இருப்பதாக சமூக வலைதளங்களில் ஒருவித கருத்து உள்ளது. ஏனெனில் ஹர்பஜன் இந்திய அணியில் இருக்கும்போது அறிமுகம் ஆன அஸ்வின் நாளடைவில் அவரை முந்தி நிலையான இடம் பிடித்தார். மேலும் ஓய்வு பெற்ற பின் வர்ணனையாளராக செயல்பட்ட ஹர்பஜன் சிங் சில நேரங்களில் அஸ்வினை மறைமுகமாக விமர்சித்துள்ளார். இதனால் அஸ்வினுக்கும் ஹர்பஜனுக்கும் இடையே பிரச்சினை என்று சமூக வலைதளங்களில் கருத்துகள் காணப்படுகின்றன. அத்துடன் அஸ்வினை பார்த்து ஹர்பஜன் சிங் பொறாமைப்பட்டதாகவும் கூறப்பட்டன.

இந்நிலையில் ரவிச்சந்திரன் அஸ்வினின் யூடியூப் சேனலில் ஹர்பஜன் சிறப்பு விருந்தினராக கலந்து கொண்டார். அவரிடம் இது குறித்து அஸ்வின் நேரடியாக கேள்வி எழுப்பினார்.

இது குறித்து அஸ்வின் பேசியது பின்வருமாறு:- பொறாமை சம்பந்தமான கேள்வி இது. நீங்கள் அதற்குப் பதிலளிக்க அனுமதிப்பதற்கு முன், நான் ஒன்றை தெளிவுபடுத்துகிறேன். மக்கள் எல்லாவற்றையும் தங்கள் பார்வையில் இருந்து பார்க்கிறார்கள். அந்த வகையில் இன்று உங்களை நேர்காணல் செய்யும் நபரை (அஸ்வின்) பார்த்து நீங்கள் (ஹர்பஜன்) பொறாமைப்படுவதாக அவர்கள் கருதுகிறார்கள். அது என்னவாக இருக்கும், பஜ்ஜி பா? என்று கேட்டார்.

அதற்கு பதிலளித்த ஹர்பஜன், "உங்களைப் பார்த்து நான் பொறாமைப்படுகிறேன் என்று நீங்கள் நினைக்கிறீர்களா? அஸ்வின். நீங்கள் இன்று என்னுடன் அமர்ந்திருக்கிறீர்கள், நாம் நீண்ட நேரம் பேசியுள்ளோம். நான் அந்த மாதிரியான நபர் என்று நினைக்கிறீர்களா?" என்று ஹர்பஜன் பதில் கேள்வி எழுப்பினார்.

இதற்கு பதிலளித்த அஸ்வின், "ஒரு காலத்தில் நீங்கள் பொறாமைப்பட்டிருந்தாலும், அது நியாயமானது என்று நினைக்கிறேன். அதுதான் எனது கருத்து. நாம் அனைவரும் மனிதர்கள் என்பதால் நான் அதை ஒருபோதும் தவறாக எடுத்துக்கொள்ள மாட்டேன். இயற்கையாகவே, அது அப்படித்தான். வாஷிங்டன் சுந்தர் வந்ததாலேயே நான் ஓய்வு பெற்றேன் என்று சிலர் நம்புகிறார்கள். இதெல்லாம் மற்றவர்களின் பார்வை" என்று கூறினார்.