செயின்ட் லூயிஸ்,

கிராண்ட் செஸ் சுற்றுப்பயணத்தின் ஒரு அங்கமான சின்கியுபீல்ட் கோப்பை செஸ் போட்டி அமெரிக்காவில் உள்ள செயின்ட் லூயிஸ் நகரில் நடந்து வருகிறது. இதில் நேற்று முன்தினம் இரவு நடந்த 5-வது சுற்று ஆட்டம் ஒன்றில் உலக சாம்பியனான தமிழகத்தை சேர்ந்த குகேஷ், ஜன் கிர்சிஸ்போப் டுடாவை (போலந்து) சந்தித்தார்.

கருப்புநிற காய்களுடன் ஆடிய குகேஷ் 45-வது நகர்த்தலில் டிரா கண்டார். இதே போல் மற்றொரு தமிழக வீரர் பிரக்ஞானந்தா 26-வது நகர்த்தலில் மேக்சிம் வச்சியர் லக்ரேவுடன் (பிரான்ஸ்) டிரா செய்தார். வெஸ்லி சோ- பாபியானோ கருனா (இருவரும் அமெரிக்கா), நோடிர்பெக் அப்துசத்தோரோவ் (உஸ்பெகிஸ்தான்)- சாம் சேவியன் (அமெரிக்கா), அலிரெஜா பிரோவ்ஜா (பிரான்ஸ்)- லெவொன் அரோனியன் (அமெரிக்கா) இடையிலான ஆட்டங்களும் டிராவில் முடிந்தன.

இன்னும் 4 சுற்று எஞ்சி இருக்கும் நிலையில் பாபியானோ கருனா 3½ புள்ளிகளுடன் முதலிடத்திலும், லெவொன் அரோனியன், பிரக்ஞானந்தா தலா 3 புள்ளிகளுடன் 2-வது இடத்திலும் உள்ளனர்.