தொட்டது துலங்கும் நாள். தொகை கேட்ட இடத்தில் கிடைக்கும். தந்தை வழி அனுகூலம் உண்டு. மறைமுக போட்டிகளை சாமர்த்தியமாகச் சமாளிப்பீர்கள்.  வரவு திருப்தி தரும். தேக நலன் சீராகும்.

14-06-2019 முதல் 20-06-2019 வரை

மேன்மையான செயல்களைச் செய்யும் மேஷ ராசி அன்பர்களே!

இந்த வாரம் நெருங்கிய வயதான உறவினர் மூலம் நன்மைகள் உண்டாகும். பழைய பிரச்சினைகளுக்கு நல்ல தீர்வு காண்பீர்கள். இதுவரை மூத்த சகோதரர்களால் ஏற்பட்ட தடைகள் விலகும். மனசஞ்சலங்கள் உண்டாகும் போது விநாயகப்பெருமான் அருளும், அவர் பிரசாதமும் உங்கள் தொல்லையைப் போக்கும். வெளிநாட்டு பயணங்களுக்கு முயற்சி செய்பவர்களுக்கு சாதகமான பதில் கிடைக்கும். மருத்துவத் தொழில் செய்பவர்களுக்கு, பாராட்டும் புகழும் தேடி வரும். பழைய கடன்களை அடைப்பீர்கள். நீண்ட கால பகை விலகும். வழக்கம் போல் எதிரிகளை நண்பர்களாகக் கருதும் உங்கள் குணம், உங்களுக்குக் கை கொடுக்கும். அரசுப் பணியில் இருப்பவர்களும், நெருப்பு சம்பந்தப்பட்ட தொழில் செய்பவர்களும் அதிக கவனம் செலுத்த வேண்டிய கால கட்டம் இது. எதிலும் சற்று விலகி நிற்பது நன்மை தரும். உடல் ஆரோக்கியத்தில் தனி கவனம் செலுத்துங்கள். வயிறு சம்பந்தமான விஷயத்தில் கூடுதல் கவனம் தேவை. உடனடியாக மருத்துவரிடம் ெசல்வது அதிகச் செலவுகளைக் குறைக்கும்.

இந்த வாரம் ஞாயிற்றுக்கிழமை அன்று சூரிய பகவானை வழிபடுங்கள். தேவையற்ற சங்கடங்கள் நீங்கும்.

சந்திராஷ்டமம்:- அசுவினி: சனிக்கிழமை பகல் 11.08 மணி முதல் ஞாயிறு பகல் 11.10 மணி வரை. பரணி: ஞாயிறு பகல் 11.11 மணி முதல் திங்கட்கிழமை பகல் 11.43 மணி வரை. கிருத்திகை: திங்கட்கிழமை பகல் 11.44 மணி முதல் செவ்வாய்க்கிழமை பகல் 12.45 மணி வரை.

19-12-2017 முதல் 28-03-2020 வரை

அசுவதி, பரணி, கார்த்திகை 1-ம் பாதம் வரை (பெயரின் முதல் எழுத்துக்கள்: சு, சே, சோ, ல, லி, லு, லே, லோ, அ உள்ளவர்களுக்கும்)

விலகிவிட்டது சனி! விரும்பியது நடக்கும் இனி!

மனதில் பட்டதை மறைக்காமல் சொல்லும் மகத்தான குணம் பெற்ற மேஷ ராசி நேயர்களே!

எந்தக் காரியத்தையும் வெற்றிகரமாகச் செய்து முடிக்க நினைக்கும் உங்களுக்கு கடந்த இரண்டரை ஆண்டுகளுக்கு மேலாக நடைபெற்று வந்த அஷ்டமத்துச் சனியின் ஆதிக் கம் விலகி, இப்பொழுது ஆனந்தமான வாழ்க்கையை அமைத்துக் கொடுக்கப் போகின்றது.

இந்த சனிப்பெயர்ச்சியால் மிகுந்த நற்பலன்களைப் பெறும் ராசிகளில் முதன்மையான ராசியாக உங்கள் ராசி விளங்கப் போகின்றது. எண்ணற்ற பிரச்சினைகளைச் சந்தித்து வந்த உங்களுக்கு இப்பொழுது விடிவுகாலம் பிறந்துவிட்டது.

விலகிய சனியை, விலகும் நாளிலேயே கும்பிட்டு மகிழ்வது நல்லது. பொதுவாக திருநள்ளாறு சென்று நளதீர்த்தத்தில் குளித்து அங்குள்ள காக வாகனச்சனியை வழிபட்டு வந்தால் கடந்த காலத்தில் ஏற்பட்ட சிக்கல் களும், சிரமங்களும் அகலும்.

திருக்கொள்ளிக் காட்டிலுள்ள பொங்கு சனீஸ்வரர் வழிபாட்டையும் நீங்கள் மேற்கொள்ளலாம். மேலும் சிவகங்கை மாவட்டம் திருப்பத்தூர் அருகிலுள்ள பெரிச்சிக் கோவிலில் வீற்றிருந்து அருள்வழங்கும் வன்னி மரத்தடி சனீஸ்வரர், குச்சானூர் சனிபகவான் போன்ற ஆலயங்களுக்குச் சென்று வழிபட்டு வருவது நல்லது. சனி விலகும் இந்த நேரத்தில் சனி பகவான் சன்னிதியில் எள் தீபம் ஏற்றி வழிபட்டால் நல்லது நடக்கும்.

9-ம் இடத்தில் சஞ்சரிக்கும் சனி பகவான் ஒளிமயமான வாழ்க்கைக்கு வழிவகுத்துக் கொடுப்பார். பொன், பொருட்களின் சேர்க்கை அதிகரிக் கும். பிரிந்து சென்ற உறவினர்கள் இனி பாசத்தோடு வந்திணைவர். செல்வாக்கு உயரும்.

ஒன்பதாமிடத்துச் சனி பொன், பொருளைத் தருமா?

மாபெரும் கிரகம் என்று வர்ணிக்கப்படும் சனி பகவான் உங்கள் ராசிக்கு 10, 11 ஆகிய இடங்களுக்கு அதிபதியாவார். தொழில் மற்றும் லாப ஸ்தானத்திற்கு அதிபதியாக விளங்கும் சனி பகவான், தற்சமயம் பிதுர்ரார்ஜித ஸ்தானம் எனப்படும் தந்தைவழி முன்னேற்றத்தைக் குறிக்கும் இடத்திற்கு பெயர்ச்சியாகப் போகின்றார். எனவே பெற்றோர்களின் ஆதரவு உங்களுக்கு கிடைக்கும். அவர்கள் மூலமாக தொழில்வளர்ச்சியைப் பெருக்கிக் கொள்ள வாய்ப்புகள் உருவாகும். உடன்பிறப்புகளிடம் காட்டிய பாசத்தை இனி உங்களிடமும் காட்டுவர். உறவுகளிலிருந்த மனக்கசப்புகள் மாறும்.

ஒன்பதில் வந்த ஈசன்
உன்னத வாழ்வைத் தந்து
பொன்பொருள் குவிய வைக்க
புகழ்மிக்க வாழ்வு காண
அன்புடன் சனியைக் கண்டும்
அனுமனை வழி பட்டாலும்
வன்பகை மாறும்! நல்ல
வசந்தமும் வந்து சேரும்!

என்று ஜோதிட சாஸ்திரம் சொல்கின்றது.

எனவே, காக வாகனத்தானையும், அனுமனையும் கைகூப்பி வழிபடுவது நல்லது.

ஒரு கிரகம் எந்த இடத்தின் ஆதிபத்யத்திற்கு உரியதோ அந்த இடத்திற்குரிய செயல்பாடுகளை செய்வதில் தடை ஏற்படுத்தாது.

ஒரு வேளை உங்கள் சுயஜாதகத்தில் திசாபுத்தி வலிமை இழந்திருந்தாலோ, ராகு-கேதுக்களின் ஆதிக்கத்தில் சிக்கி இருந்தாலோ சனி, குரு போன்ற கிரகங்கள் பகை கிரகத்தின் பாத சாரத்தில் இருந்தாலோ, உங்களுக்கு நற்பலன்கள் ஏற்படுவதில் தாமதங்கள் ஏற்படலாம்.

தடைக்கற்களை படிக்கற்களாக மாற்றுவது பரிகாரங்கள் தான். எனவே ஜாதக அடிப்படையில் வரம் கொடுக் கும் தெய்வத்தை தேர்ந் தெடுத்து அதற்குரிய ஸ்தலங்களுக்கு யோகபலம் பெற்ற நாளில் சென்று வழிபட்டு வந்தால் வாய்ப்புகள் வாயிற் கதவைத் தட்டும். வருமானம் திருப்திகரமாக இருக்கும்.

இதுவரை எட்டில் சனி சஞ்சரித்த பொழுது மன உளைச்சல் அதிகமாக இருந்திருக்கலாம். குடும்பத்தில் கருத்து வேறுபாடுகளும் பணத்தட்டுப்பாடுகளும் அதிகரித்திருக்கலாம். ஆரோக்கியப் பாதிப்பால் மருத்துவச் செலவு கூடியிருக்கலாம். உத்தியோகத்தில் நிரந்தரமில்லாத நிலை, சம்பள உயர்வில் தடை போன்றவைகள் ஏற்பட்டிருக்கலாம்.

இனி அந்த நிலை மாறப்போகின்றது. வாகன வசதிகளும், வளர்ச்சியும் கூடப்போகின்றது. பாக்கிய ஸ்தானத்தில் சஞ்சரிக்கும் சனி சகல பாக்கியங்களையும் உங்களுக்கு வழங்கப் போகின்றது. நீங்கள் தீட்டிய திட்டங் களுக்கு முக்கிய நபர்கள் வந்து ஒத்துழைப்புச் செய்வர்.

மந்தனின் பார்வையால் ஏற்படும் மகத்தான பலன்கள்!

சனி பகவான் 9-ம் இடத்தில் சஞ்சரிக்கும் பொழுது அதன் பார்வை 3, 6, 11 ஆகிய இடங்களில் பதிகின்றது. எனவே இதுவரை மனஅமைதியின்றி பிரச்சினைக்கு மத்தியில் வாழ்ந்த உங்களுக்கு இனி மன அமைதி கிடைக்கப் போகின்றது. சகோதரர்களுடன் இருந்த சச்சரவுகள் அகலும். பாகப் பிரிவினைகள் சுமுகமாக முடிய அவர்கள் ஒத்துழைப்புச் செய்வர். இளைய சகோதரத்துடன் இணக்கம் ஏற்படும்.

உடன்பிறப்புகள் வழியில் தொழில் தொடங்கும் முயற்சியில் ஈடுபட்டவர் களுக்கு அது கைகூடும். நீண்ட நாட்கள் நிலுவையில் இருந்த வழக்குகள் சாதகமாக முடியும். கட்டிடப் பணி பாதியில் நிற்கின்றதே என்ற கவலை இனி அகலும். அசையா சொத்துகள் வாங்குவதில் இருந்த தடைகள் அகலும். பணியாளர்கள் பக்குவமாக நடந்து கொள்வர்.

6-ம் இடத்தையும் சனி பார்ப்பதால் எதிரிகள் சரணடைவர். இல்லம் தேடி நல்ல தகவல் வந்து சேரும். உத்தியோகத்தில் ஒரு சிலருக்கு பதவி உயர்வு, ஊதிய உயர்வு, அதிகார பலம் போன்றவை தானாகத் தேடிவரும். சக பணியாளர்களின் ஒத்துழைப்பு கிடைக்கும். வியாபாரத்தில் ஈடுபட்டிருப்பவர்களுக்கு வங்கிகளின் ஒத்துழைப்போடு அதிக முதலீடு செய்ய தொகை கிடைக்கும்.

சனியின் பார்வை லாப ஸ்தானத்தில் பதிவதால் பொருளாதாரப் பற்றாக்குறை அகலும். சேமிப்பு உயர வழிவகை செய்து கொள்வீர்கள். இப்பொழுது பிள்ளைகளாலும், வாழ்க்கைத் துணையாலும் வருமானம் வரலாம்.

குதூகலம் தரும் குருப்பெயர்ச்சிக் காலம்!

4.10.2018-ல் விருச்சிக ராசியில் குரு சஞ்சரிக்கப் போகின்றார். அதன்பிறகு 28.10.2019-ல் தனுசு ராசிக்கு குரு செல்கின்றார். இந்த சனிப் பெயர்ச்சிக் காலத்தில் இரண்டு முறை குருப்பெயர்ச்சி நிகழவிருக்கின்றது. இதன் விளைவாகவும் நீங்கள் நல்ல மாற்றங்களைச் சந்திக்கப் போகிறீர்கள்.

விருச்சிகத்தில் குரு சஞ்சரிக்கும் பொழுது அதன் பார்வை 2, 4, 12 ஆகிய இடங்களில் பதிகின்றது. எனவே வாக்கு, தனம், குடும்பம் ஆகிய இடங்கள் புனிதமடைகின்றன. எனவே பொருளாதார நிலையில் இருந்த ஏற்ற இறக்கங்கள் மாறும். கல்யாணப் பேச்சு வார்த்தைகள் கைகூடும். புத்திர விருத்திக்கான வாய்ப்பு உருவாகும்.

அஷ்டமத்தில் குரு அடியயெடுத்து வைக்கின்றாரே என்று நீங்கள் நினைக்க வேண்டாம். 12-க்கு அதி பதியான குரு பகவான் அஷ்டமத்தில் சஞ்சரிக்கும் பொழுது பலவித நல்ல வாய்ப்புகள் வந்து சேரும். தாய் வழி ஆதரவு உண்டு. உத்தியோகத்தில் விருப்ப ஓய்வில் சுயதொழில் தொடங்கும் வாய்ப்பு உண்டு.

தனுசு ராசியில் குரு சஞ்சரிக்கும் பொழுது உங்கள் ராசியையும், மூன்று, ஐந்து ஆகிய இடங்களையும் பார்க்கப் போகின்றார். எனவே ஆரோக்கியம் சீராகும். குடும்பத்தில் சுபகாரியப் பேச்சுகள் கைகூடும். பூர்வீக சொத்து களை விற்றுப் புதிய சொத்துகளை வாங்கும் முயற்சியில் ஆர்வம் காட்டுவீர்கள்.

ராகு-கேது பெயர்ச்சிக் காலம்!

13.2.2019-ல் மிதுன ராசியில் ராகுவும், தனுசு ராசியில் கேதுவும் சஞ்சரிக்கின்றார்கள். உங்கள் ராசிக்கு 3-ல் சஞ்சரிக்கும் ராகு முன்னேற்றப் பாதைக்கு வழிகாட்டப் போகின்றார்.

9-ல் சஞ்சரிக்கும் கேது ஒளிமயமான வாழ்விற்கு உத்தரவாதம் தரப்போகின்றது. அடிப்படை வசதிகள் பெருகும். மறைமுக எதிர்ப்புகள் மாறும். மாற்று இனத்தவர்களின் ஒத்துழைப்பு கூடுதலாக கிடைக்கும்.

பரம்பரை சொத்துகளில் உங்களுக்கு கிடைக்க வேண்டிய பங்கு முறையாக வந்து சேரும். வெளிநாட்டு தொடர்பு அனுகூலம் தரும். பங்காளிப் பகை மாறும். பிறருக்கு பொறுப்பு சொல்லி வாங்கிக் கொடுத்த தொகை வந்து சேரும். ஆலயத்திருப்பணிகளில் ஆர்வம் காட்டுவீர்கள்.

மங்கையருக்கான மகத்தான பலன்கள்!

மேஷ ராசியில் பிறந்த பெண்களுக்கு இந்த சனிப்பெயர்ச்சி நினைத்தது நினைத்தபடியே நிறைவேறும். கல்யாணம், குழந்தை பாக்கியம் போன்றவற்றில் இருந்த தடைகள் அகலும். சுபநிகழ்ச்சிகள் அதிகம் நடைபெறும். கணவன்- மனைவி ஒற்றுமை பலப்படும். குலதெய்வப் பிரார்த்தனைகளை நிறைவேற்றி குடும்ப முன்னேற்றத்திற்கு வழிவகுத்துக் கொள்வீர்கள்.

பிள்ளைகளின் கல்வி சம்பந்தமாகவோ, எதிர்கால முன்னேற்றம் கருதியோ எடுத்த முயற்சிகள் பலன்தரும். தாய் மற்றும் உடன் பிறப்புகளின் ஆதரவு கூடுதலாகக் கிடைக்கும்.

9-ல் சஞ்சரிக்கும் சனி பொன், பொருட்கள் சேர வழிவகுத்துக் கொடுப்பார். ஆரோக்கியம் சீராகும். உத்தியோகத்தில் உள்ளவர் களுக்கு சம்பள உயர்வு, பதவியில் உயர்வு போன்றவைகள் வந்து சேரும்.

சுய ஜாதகத்தில் திசாபுத்திக்கேற்ற தெய்வங்களை வழிபடுவதோடு சனிக்கிழமை தோறும் விநாயகப் பெருமானை வழிபடுவது நல்லது.

தொட்ட காரியங்களில் வெற்றி பெற வழிபாடு!

சிவாலயத்திற்கு சென்று சனி பகவான் சன்னிதியில் எள் தீபம் ஏற்றி அர்ச்சனை செய்து வழிபட்டு வருவது நல்லது. வியாழன் தோறும் குரு வழிபாட்டையும் மேற்கொள்ளுங் கள். ராகு-கேதுக்களின் மூலம் நற்பலன்கள் கிடைக்க சர்ப்ப சாந்திப் பரிகாரம் செய்வது நல்லது.

சிறப்பு வழிபாடாக யோகபலம் பெற்ற நாளில் தஞ்சை பெரிய கோவிலுக்குச் சென்று பிரகதீஸ்வரர், அம்பிகை, வராஹி வழிபாட்டை மேற்கொண்டால் வளர்ச்சி கூடும்.

சனியின் வக்ர காலம்!

25.4.2018 முதல் 21.8.2018 வரை மூல நட்சத்திரக் காலில் சனி வக்ரம் பெறுகின்றார். 8.5.2019 முதல் 3.9.2019 வரை மீண்டும் பூராட நட்சத்திரக் காலில் சனி வக்ரம் பெறுகின்றார்.

இக்காலத்தில் தொழிலில் கொஞ்சம் கூடுதல் கவனம் தேவை. இழப்பு களையும், ஏமாற்றங்களையும் சந்திக்க நேரிடும். விரயங்கள் கூடுதலாக இருக்கும். எதிர்காலத்தைப் பற்றிய பயம் உருவாகும். அருகில் உள்ளவர்களின் ஆதரவு குறைவாகவே கிடைக்கும். பங்குதாரர்கள் உங்கள் பணிக்கு ஒத்துழைப்புச் செய்ய மறுப்பர். உடல் ஆரோக்கியத்தில் அச்சுறுத்தல்கள் ஏற்பட்டு அகலும். புதியவர்களை நம்பி ஒப் படைத்த பொறுப்புகள் நடைபெறாமல் போகலாம். வழிபாட்டில் கவனம் செலுத்துவதன் மூலமே வளர்ச்சியைக் கூட்டிக் கொள்ள இயலும்.

4-10-2018 முதல் 28-10-2019 வரை

அசுவதி, பரணி, கார்த்திகை 1–ம் பாதம் வரை

(பெயரின் முதல் எழுத்துக்கள்: சு, சே, சோ, ல, லி, லு, லே, லோ, அ உள்ளவர்களுக்கும்)

எட்டாமிடத்தில் குரு பகவான்! எதிலும் நிதானம் இனித்தேவை!

மற்றவர்கள் செய்யும் தவறுகளை தட்டிக் கேட்கத் தயங்காத மே‌ஷ ராசி நேயர்களே!

செவ்வாய் என்ற வலிமையான கிரகத்தின் ஆதிக்கம் பெற்ற ராசியைக் கொண்டவர்கள் நீங்கள். ‘தைரியகாரகன்’ என்று அழைக்கப்படுபவர் செவ்வாய்.

எனவே தைரியமும், தன்னம்பிக்கையும் தக்க விதத்தில் பெற்றிருப்பவர்கள் நீங்கள். எதற்கும் அஞ்சாத நெஞ்சம், உணர்ச்சிவசப்படும் குணம், சுயமுடிவெடுத்து வெற்றி பெறும் மனோபலம், எதையும் எதிர்த்துப் போராடும் வலிமை இத்தனையும் பெற்றிருப்பவர்கள் நீங்கள். அதே நேரத்தில் முகத்தில் அமைதியும், மனதிற்குள் அலைமோதும் பிரச்சினைகளும் எப்பொழுதும் இருந்துகொண்டே இருக்கும்.

நீங்கள் எதிர்பார்த்துக் காத்திருந்த குருப்பெயர்ச்சி இப்பொழுது வந்துவிட்டது. இப்பொழுது வந்திருக்கும் குருப்பெயர்ச்சி விபரீத ராஜயோகக் குருப்பெயர்ச்சி என்பதை அறிந்து கொள்ளுங்கள். இந்த நேரத்தில் குருப்பெயர்ச்சியை மட்டும் கணக்கில் கொள்ளக் கூடாது. உங்கள் ராசிக்கு மற்ற இடங்களில் வரும் கிரகங்களின் அமைப்புகளின் படியும், உங்கள் சுய ஜாதகத்தில் நடக்கும் திசாபுத்தி அடிப்படையிலும் குரு பகவானின் அதிசார மற்றும் வக்ர இயக்கத்தின்படியும் நன்மை தரும் விதத்தில் இருக்கின்றதா? என்பதை அறிந்து கொள்ள வேண்டும்.

இந்த குருப்பெயர்ச்சி காலத்தில் 13.2.2019 அன்று ராகு கேதுக்களும் பெயர்ச்சியாகப் போவதால் அதை பொறுத்தும் ஒருசில மாற்றங்கள் உங்களுக்கு ஏற்படும்.

புரட்டாசி 18–ந் தேதி குரு பகவானுக்குரிய வியாழக்கிழமை அன்று, குரு பகவானுக்குரிய நட்சத்திரமான விசாகம் நட்சத்திரத்தில் விருச்சிக ராசிக்கு  குரு வருவது யோகம்தான். உங்களைப் பொறுத்தவரை அஷ்டமத்தில் அடியெடுத்து வைப்பதற்கு முன்ன தாகவே முறையாக குரு தட்சிணாமூர்த்தியையும், நவக்கிரகத்திலுள்ள குருவையும், நாயன்மார்கள் அறுபத்து மூவரையும் வழிபட்டு வாருங்கள். ராகு–கேது பெயர்ச்சி நன்மையை வழங்க சர்ப்ப சாந்திப் பரிகாரங்களை மேற்கொள்வது நல்லது.

விருச்சிக குருவின் சஞ்சாரம்!

4.10.2018–ல் விருச்சிகத்தில் சஞ் சரிக்கும் குரு பகவான் 28.10.2019 வரை அங்கிருந்து அதன் பார்வை பலத்தால் உங்களுக்கு மிகுந்த நன்மைகளை வழங்கப்போகின்றார். 13.3.2019–ல் தனுசு ராசிக்கு குரு அதிசாரமாகச் செல்கின்றார். 10.4.2019–ல் தனுசு ராசியில் வக்ரம் பெறுகின்றார். 19.5.2019–ல் மீண்டும் விருச்சிகத்தில் சஞ்சரித்து வக்ர கதியில் இயங்குகின்றார். 7.8.2019–ல் விருச்சிக ராசியில் குரு வக்ர நிவர்த்தியாகின்றார். குரு அதிசாரமாக தனுசு ராசியில் சஞ்சரிக்கும் பொழுது, 5–ம் பார்வையாக உங்கள் ராசியைப் பார்க்கப் போகின்றார்.  

இந்த குருப்பெயர்ச்சியின் விளைவாக மங்கல நாண் சூடுகின்ற வாய்ப்பும், மழலைச் சத்தம் கேட்கவில்லையே என்று ஏங்கியிருந்த தம்பதிகளுக்கு புத்திரப்பேறு கிடைக்கும் வாய்ப்பும் உருவாகும்.

“எட்டினில் குருதான் வந்தால் எண்ணற்ற மாற்றம் சேரும், திட்டங்கள் வெற்றியாக தெய்வங்கள் துணையாய் நிற்கும்” என்று முன்னோர்கள்        சொல்லியிருக்கின்றனர். எனவே வாழ்க்கைப் பாதை சீராக அமையும். வணிகம் செய்வதில் வளர்ச்சியும், லாபமும் கிடைக்கும்.

குரு பார்வையால் ஏற்படும் பலன்கள்!

குருவின் பரிபூரண பார்வை 2, 4, 12 ஆகிய இடங்களில் பதிகின்றது. எனவே குடும்பம், வாக்கு, தனவரவு, கல்வி, கவுரவம், நண்பர்களால் ஆதாயம், தாய்வழி ஆதரவு, வாகன யோகம், கலை, இடம், பூமி, உறவு, சுபவிரயம், விவாதத்தில் வெற்றி, அரசு வழி ஆதரவு, இடமாற்றங்களால் இனிமை போன்றவற்றில் எல்லாம் குருவின் பார்வை பலத்தால் நற்பலன்கள் கிடைக்கப் போகின்றது.

குரு உங்கள் ராசிக்கு 9–ம் இடத்திற்கு அதிபதியாக விளங்கி தன ஸ்தானத்தைப் பார்ப்பது யோகம் தான். ‘‘இரண்டினை குருதான் பார்த்தால் திரண்டிடும் செல்வம்’’ என்பர். எனவே செல்வநிலை சிறப்பாகவே இருக்கும்.  அசையா சொத்துகள் வாங்குவதில் அதிக கவனம் செலுத்துவீர்கள். உறவினர்களுக்கு கொடுத்த பணம் எப்பொழுது வரும் என்று எதிர்பார்த்துக் காத்திருந்தவர்களுக்கு இப்பொழுது கணிசமான தொகை கைக்குவந்து சேரப்போகின்றது.

‘நான்கினை குரு தான் பார்த்தால் நலங்களும், சுபமும் வாய்க்கும்’ என்பது முன்னோர் வாக்கு. எனவே குருவின் பார்வை பலனால் உடல் ஆரோக் கியம் சீராகி உற்சாகப்படுத்தும். வீடு கட்டும் பணி பாதியில் நிற்கின்றதே என்ற கவலை அகலும். பத்திரப் பதிவிலிருந்த குழப்பங்கள் மாறும். தாயின் உடல் நலம் சீராகும். மாமன், மைத்துனர் வழி உறவில் இருந்த விரிசல் அகலும். குழந்தைகளின் மேற் படிப்புக்கு எடுத்த முயற்சிகள் நிறைவேறும்.

‘பனிரெண்டை குருதான் பார்த்தால் பயணத்தால் பலன் கிடைக்கும்’என்று சாஸ்திரம் சொல்கின்றது. எனவே அடிக்கடி பயணங்கள் வந்து கொண்டேயிருக்கும். உத்தியோகம் சம்பந்தமாக அந்நிய தேசத்திற்கோ, அந்நிய மாநிலத்திற்கோ சென்று பணிபுரியும் வாய்ப்புக் கிட்டும். பழைய வாகனங்களைக் கொடுத்துவிட்டுப் புதிய வாகனங்கள் வாங்குவீர்கள்.

உத்தியோகத்தில் உள்ளவர் களுக்கு திடீர் ஊர் மாற்றம், இட மாற்றம் ஏற்படலாம். வரும் மாற்றங்களை ஏற்றுக்கொள்வதுதான் நல்லது. புதிய ஒப்பந்தங்களில் கையெழுத்திடும் பொழுது கொஞ்சம் யோசித்துக் கையெழுத்திடுவது நல்லது.

தெசாபுத்தி பலமிழந்தவர்கள்  அஷ்டமத்து குருவின் ஆதிக்க காலத்தில் நிறைய இன்னல்களையும், ஏமாற்றங்களையும் சந்திக்க நேரிடலாம்.  அவற்றிலிருந்து விடுபட எதையும் முன்யோசனையுடனும், குடும்ப பெரியவர்களைக் கலந்து ஆலோசித்தும் செய்வது நல்லது.

குருவின் பாதசார பலன்கள்!

இக்காலத்தில் குரு பகவான் தன் சுய சாரத்தில் சஞ்சரிக்கின்றார். எனவே நினைத்த காரியம் நினைத்தபடியே நடைபெறும். நிகழ்காலத் தேவைகள் பூர்த்தியாகும். அனைத்து முயற்சிகளிலும் ஆதாயம் கிடைக்கும். குடும்பத்திலிருந்த குறுக்கீடுகள் அகலும். கணவன்–மனைவி  இடையே நெருக்கம் அதிகரிக்கும். உத்தியோகத்தில் எதிர்பார்த்த சம்பள உயர்வும், புதிய பொறுப்புகளும் கேட்காமலேயே கிடைக்கலாம். கடன் வாங்கியாவது வாகனங்களை வாங்கும் யோகம் கைகூடும்.

21.10.2018 முதல் 19.12.2018 வரை அனு‌ஷ நட்சத்திரக் காலில் குரு சஞ்சரிக்கின்றார். சனி சாரத்தில் குருபகவான் சஞ்சரிக்கும் பொழுது, தொழில் வளர்ச்சி சிறப்பாக இருக்கும். புதிய பங்குதாரர்கள் வந்திணைவர். ஆடை, ஆபரண சேர்க்கை உண்டு. வருமானம் திருப்தியாக இருக்கும். வாங்கிய கடனைக் கொடுத்து மகிழ்வீர்கள். பணியாளர்கள் தொல்லை அகலும். அந்நிய தேச அழைப்புகள் வரும்.

20.12.2018 முதல் 12.3.2019 வரை மற்றும் 18.5.2019 முதல் 27.10.2019 வரை கேட்டை நட்சத்திரக் காலில் குரு சஞ்சரிக்கின்றார். புதன் சாரத்தில் குரு சஞ்சரிக்கும் பொழுது வழக்குகள் சாதகமாக முடியும். வருங்காலத்தைப் பற்றிய பயம் அகலும். குடும்பத்தில் நீண்ட நாட்களாக நடைபெறாத ஒருசில காரியங்கள் நடைபெறும். உத்தியோகத்தில் சக பணியாளர்களின் ஒத்துழைப்போடு கூட்டு முயற்சிகளில் வெற்றி காண்பீர்கள். பணி நீக்கம் பெற்றிருந்தவர்கள் மீண்டும் பணியில் சேர வாய்ப்பு உருவாகும். மேலதிகாரிகளின்  ஆதரவோடு நினைத்த இடத்திற்கு மாறுதல் கேட்டவர்களுக்கு அது கை கூடும்.

13.3.2019 முதல் 17.5.2019 வரை மூலம் நட்சத்திரக் காலில் குரு பகவான் சஞ்சரிக்கின்றார். கேது சாரத்தில் குரு பகவான் சஞ்சரித்தாலும் தனுசு ராசிக்குள் அவர் பிரவேசிப்பதால் அவரது பார்வை பலம் 1, 7, 9 ஆகிய இடங்களில் பதிகின்றது. எனவே ஆதரவுக் கரம் நீட்டுபவர் களின் எண்ணிக்கை அதிகரிக்கும். வெளிநாட்டு யோகம் முதல் அத்தனை யோகங்களும் வந்து சேரும். ஆன்மிக நாட்டம் அதிகரிக்கும். உடல் நிலையில் இதுவரை இருந்த தொல்லைகள் ஓடி ஒளியும். உறவினர்களிடம் இருந்த பிணக்குகள் அகன்று இணக்கம் ஏற்படும். வருமானம் சீராக இருக்கும். கல்யாண வாய்ப்புகள் கைகூடும்.

குருவின் வக்ர காலம்!

இந்தக் குருப்பெயர்ச்சியால் விருச்சிக ராசிக்குள்ளும் குரு பகவான் வக்ரம் பெறுகின்றார். தனுசு ராசிக்குள் சஞ்சரிக்கும் பொழுதும் வக்ரம் பெறுகின்றார். குரு வக்ர இயக்கத்தில் இருக்கும் பொழுது நன்மையும், தீமையும் கலந்து நடைபெறும். உழைப்பிற்கேற்ற பலன் கிடைப்பது அரிது. குடும்ப உறுப்பினர்கள் உங்கள் குணமறிந்து நடந்து கொள்ள மாட்டார்கள். சேமிப்புகள் கரையலாம். இட மாற்றங்கள் சாதகமாக அமையும். பொதுவாக இக் காலத்தில் விழிப்புணர்ச்சியோடு இருந்தால் விரயங்களிலிருந்து  மீளலாம்.

செல்வ வளம் தரும் சிறப்பு வழிபாடு!

உங்கள் ராசிநாதன் செவ்வாய் என்பதால் செவ்வாய்க்கிழமை  முருகப்பெருமான் வழிபாடும், அஷ்டமத்து குருவின் ஆதிக்கம் இருப்பதால் எல்லையில்லாத வரம்தரும் பிள்ளையார்பட்டி கற்பகவிநாயகரையும், அங்குள்ள தட்சிணாமூர்த்தியையும் பவுர்ணமியன்று வழிபட்டு வருவது நல்லது.

பெண்களுக்கான சிறப்புப் பலன்கள்!

மே‌ஷ ராசியில் பிறந்த பெண்கள் வழிபாட்டின் மூலம் வளர்ச்சியைக் கூட்டிக்கொள்ள இயலும். கணவன்– மனைவிக்குள் விட்டுக்கொடுத்துச் செல்வது நல்லது. எந்தப் புது முயற்சி செய்தாலும் குடும்பப் பெரியவர்களைக் கலந்து ஆலோசித்துச் செய்வது நல்லது. குருவின் பார்வை தாய் ஸ்தானத்தில் பதிவதால் தாய்வழி ஆதரவும், சகோதர ஒத்துழைப்பும் கூடுதலாகவே இருக்கும். உத்தியோகத்தில் உள்ளவர்களுக்கு வேலைப்பளு அதிகரிக்கும். இருப்பினும் மேலதிகாரிகள் உழைப்பிற்கேற்ற ஊதியம் கொடுக்க முன்வருவர். உதிரி வருமானங்களும் பெருகும். பிள்ளைகளின் கல்யாண வாய்ப்புகள் கை கூடும். அவர்கள் வேலைக்கு முயற்சி செய்திருந்தால் அது கிடைத்து அதன்மூலம் வருமானம் வரலாம். ஆடை, ஆபரணங்கள் வாங்கி மகிழ்வீர்கள். குரு அதிசாரம் பெறும்பொழுது, வாங்கிய கடனைக் கொடுக்கும் வாய்ப்பும், இடம், பூமி வாங்கும் யோகமும் உண்டு. ஆரோக்கியத்தில் மட்டும் அதிக கவனம் தேவை. குரு வழிபாடும், குலதெய்வ வழிபாடும் நன்மையை வழங்கும்.