ரஜினிகாந்த் இன்று இமயமலை பயணம்... 'ஜெயிலர்' படத்தை பார்த்துவிட்டு புறப்படுகிறார்

'சூப்பர் ஸ்டார்' ரஜினிகாந்த், தான் நடிக்கும் ஒவ்வொரு படத்தின் படப்பிடிப்பு முடிந்ததும் இமயமலைக்கு பயணிப்பது வழக்கம். உடல்நலக்குறைவு காரணமாக 2010-ம் ஆண்டுக்கு பிறகு இமயமலை பயணத்தை அவர் தவிர்த்து வந்தார்.

2018-ம் ஆண்டில் 'காலா', '2.0' படங்களின் படப்பிடிப்பு முடிந்ததும் இமயமலைக்கு சென்றார். அதன்பிறகு கொரோனா சூழல் காரணமாக பயணத்தை தவிர்த்தார். இந்த நிலையில் ரஜினிகாந்த் மீண்டும் இமயமலை பயணத்தை கையில் எடுத்திருக்கிறார்.

நெல்சன் இயக்கத்தில் ரஜினிகாந்த் நடித்துள்ள 'ஜெயிலர்' படம், நாளை மறுதினம் (வியாழக்கிழமை) 'ரிலீஸ்' ஆகிறது. இந்த படத்தை முழுமையாக பார்த்துவிட்டு ரஜினிகாந்த் இமயமலை புறப்பட இருக்கிறார். படத்தின் முதல் காப்பியை ரஜினிகாந்த் இன்று (செவ்வாய்க்கிழமை) பார்த்துவிடுவார் என்று எதிர்பார்க்கப்படுகிறது. அதன்பின்னர் இன்று இரவோ அல்லது நாளை காலையோ அவர் இமயமலை நோக்கி புறப்படுவார் என்று கூறப்படுகிறது.