அமெரிக்க உச்ச நீதிமன்றத்தின் முதல் பெண் நீதிபதி

அமெரிக்காவில் உள்ள டெக்சாஸின் எல் பாசோவில் 1930-ம் ஆண்டு மின்சாரம் கூட இல்லாத பண்ணை வீட்டில் பிறந்த சாண்ட்ரா, 1950-ம் ஆண்டு ஸ்டான்போர்ட் பல்கலைக்கழகத்தில் பொருளாதாரத்தில் பட்டம் பெற்றார். பின்னர் சட்டப் பள்ளியில் சேர்ந்து 1952-ம் ஆண்டு பட்டம் பெற்றார். அந்தக் கால கட்டத்தில் 2 சதவீத பெண்களே சட்டக்கல்லூரியில் படித்து வந்தார்கள்

   படித்து முடித்த பிறகு வழக்கறிஞராக பணிபுரிய வேண்டும் என்ற கனவுடன் வந்த சாண்ட்ராவிற்கு ஏமாற்றமே கிடைத்தது. வேலை தேடி அலைந்த அவருக்கு பணி மறுக்கப்பட்ட காரணம் அவர் ஒரு பெண் என்பதனால் மட்டுமே. மனம் தளராமல் தொடர்ந்து முயற்சித்த சாண்ட்ரா, 1965-ம் ஆண்டு முதல் 1969-ம் ஆண்டு வரை அரிசோனாவின் உதவி அட்டர்னி ஜெனரலாகவும், அரிசோனா மாநில செனட்டிலும் பணியாற்றினார். பின்னர், ஜான் ஓ கான்னர் என்பவரை திருமணம் செய்து கொண்டார். இவர்களுக்கு 3 மகன்கள் உள்ளனர்.

1981-ம் ஆண்டில், பல எதிர்க்கட்சிகளின் விமர்சனத்தையும் தாண்டி, முன்னாள் ஜனாதிபதி ரொனால்ட் ரீகனால், அமெரிக்க உச்ச நீதிமன்றத்தில் முதல் பெண் நீதிபதியாக சாண்ட்ரா தேர்ந்தெடுக்கப்பட்டார். குடிமக்கள் உரிமைகள், சுற்றுச்சூழல் பாதுகாப்பு, வாக்களிக்கும் உரிமைகள், பெண் கருக்கலைப்பு உரிமைகள், அரசியலமைப்பு சட்ட பாதுகாப்பு, பாகுபாடுகளுக்கு எதிரான பாதுகாப்பு போன்ற உச்ச நீதிமன்றத் தீர்ப்புகளில் சாண்ட்ராவின் பங்கு முக்கியமானது.

மாநில சட்டமன்ற உறுப்பினர்களின் உரிமையை மறுவரையறை செய்ததிலும், சிறுபான்மையினர் வாக்களிக்கும் உரிமைகளை உறுதிப்படுத்தும் வழக்கிலும் மிகுந்த பங்காற்றினார்.

சிறுபான்மையினருக்கான கல்வி வாய்ப்புகளை அதிகரிக்கவும், கல்லூரி வளாகத்தில் இன வேறுபாட்டை நீக்கவும், மாணவர் சேர்க்கை கொள்கைகளில் உறுதியான நடவடிக்கையைப் பயன்படுத்துவதற்கான மாநிலக் கல்லூரிகள் மற்றும் பல்கலைக்கழகங்களின் உரிமையை உறுதிப்படுத்திய வழக்கில் முக்கிய பங்காற்றினார்.