உளுந்தூர்பேட்டை அருகே மாயமான மாணவி கிணற்றில் பிணமாக மிதந்தார் போலீஸ் விசாரணை

உளுந்தூர்பேட்டை,

கடலூர் மாவட்டம் கண்டரக்கோட்டை கிராமத்தை சேர்ந்தவர் முத்துக்குமரன். இவருடைய மகள் பிரியதர்ஷினி (வயது 16). இவர் உளுந்தூர்பேட்டை அருகே பரிக்கல் கிராமத்தில் உள்ள தனது பாட்டி வீட்டில் தங்கி, அங்குள்ள அரசு உதவிபெறும் பள்ளியில் பிளஸ்–1 படித்து வந்தார். கடந்த 18–ந்தேதி காலை பள்ளிக்கு சென்ற மாணவி மாலை நீண்ட நேரம் ஆகியும் வீடு திரும்பவில்லை. இதுபற்றி தகவல் அறிந்து அதிர்ச்சியடைந்த அவருடைய பெற்றோர் மற்றும் உறவினர்கள் மாயமான மாணவியை பல்வேறு இடங்களில் தேடினர். இருப்பினும் மாணவி குறித்து எந்த தகவலும் கிடைக்கவில்லை.

இதையடுத்து முத்துக்குமரன் மாயமான தனது மகளை கண்டுபிடித்து தரக்கோரி திருநாவலூர் போலீஸ் நிலையத்தில் புகார் செய்தார். அதன்பேரில் போலீசார் வழக்குப்பதிந்து மாணவியை தேடி வந்தனர்.

இந்த நிலையில் நேற்று காலை பரிக்கல்லில் இருந்து நத்தம் கிராமத்துக்கு செல்லும் சாலையோர விவசாய கிணற்றில் மாணவி பிரியதர்ஷினி மர்மமான முறையில் பிணமாக மிதந்தார். இதைபார்த்த அப்பகுதி மக்கள் திருநாவலூர் போலீஸ் நிலையத்துக்கும், மாணவியின் பெற்றோருக்கும் தகவல் தெரிவித்தனர். தகவலின்பேரில் போலீஸ் இன்ஸ்பெக்டர் ராஜேந்திரன் தலைமையிலான போலீசார் சம்பவ இடத்துக்கு விரைந்து வந்து, கிணற்றில் பிணமாக கிடந்த மாணவியின் உடலை மீட்டனர். இதற்கிடையே சம்பவ இடத்துக்கு வந்த முத்துக்குமரன் மற்றும் அவருடைய உறவினர்கள் பிணமாக கிடந்த பிரியதர்ஷினியின் உடலை பார்த்து கதறி அழுதனர்.

இதையடுத்து போலீசார், மாணவியின் உடலை கைப்பற்றி பிரேத பரிசோதனைக்காக முண்டியம்பாக்கம் அரசு மருத்துவ கல்லூரி மருத்துவமனைக்கு அனுப்பி வைத்தனர்.

இதுகுறித்த புகாரின்பேரில் போலீசார் வழக்குப்பதிந்து மாணவி கிணற்றில் குதித்து தற்கொலை செய்து கொண்டாரா? அல்லது யாரேனும் அவரை கடத்தி கொலை செய்து கிணற்றில் வீசி சென்றார்களா? என பல்வேறு கோணங்களில் விசாரணை நடத்தி வருகின்றனர்.

மாயமான பிளஸ்–1 மாணவி மர்மமான முறையில் கிணற்றில் பிணமாக மிதந்த சம்பவம் உளுந்தூர்பேட்டை பகுதியில் பெரும் பரபரப்பை ஏற்படுத்தியுள்ளது.