கொள்ளிடம் ஆற்றில் இருந்து மணல் கடத்தி சென்ற 8 லாரிகள் பறிமுதல் டிரைவர் கைது

திருக்காட்டுப்பள்ளி,

தஞ்சை மாவட்டம் பூதலூர் போலீஸ் சப்-இன்ஸ்பெக்டர் கபீர்தாசன், சிறப்பு சப்-இன்ஸ்பெக்டர் சதானந்தம் மற்றும் போலீசார் பூதலூர்- செங்கிப்பட்டி சாலையில் வீரப்புடையான்பட்டி பஸ் நிறுத்தம் அருகே வாகன சோதனையில் ஈடுபட்டிருந்தனர். அப்போது அந்த வழியாக மணல் ஏற்றிக் கொண்டு 8 லாரிகள் வரிசையாக வந்தன. போலீசார் சோதனையில் ஈடுபடுவதை பார்த்த அந்த லாரியின் டிரைவர்கள் மற்றும் உடன் வந்தவர்கள் லாரிகளை அங்கேயே நிறுத்தி விட்டு தப்பி ஓடி விட்டனர். ஒருவர் மட்டும் பிடிபட்டார். அவரிடம் போலீசார் விசாரணை நடத்தினர். விசாரணையில் அவர் முசிறியை சேர்ந்த லாரி டிரைவர் அஸ்தாப்அகமது (வயது34) என்பது தெரியவந்தது.

ரூ.5 லட்சம்

மேலும் திருக்காட்டுப்பள்ளி அருகே உள்ள விட்டலபுரம் கொள்ளிடம் ஆற்றில் இருந்து மணலை அள்ளி லாரியில் கடத்தி சென்றது விசாரணையில் தெரியவந்தது. கடத்தி வரப்பட்ட மணலின் மதிப்பு ரூ.5 லட்சம் என போலீசார் தெரிவித்தனர். இதுகுறித்து போலீசார் வழக்குப்பதிவு செய்து அஸ்தாப் அகமதுவை கைது செய்தனர். மணல் கடத்த பயன்படுத்தப்பட்ட 8 லாரிகளும் பறிமுதல் செய்யப்பட்டன. தப்பி ஓடியவர்களை போலீசார் வலைவீசி தேடி வருகிறார்கள்.