தனியார் பால் நிறுவனங்கள் குறித்து பேச அமைச்சர் ராஜேந்திர பாலாஜிக்கு விதித்த தடை ரத்து மதுரை ஐகோர்ட்டு உத்தரவு

மதுரை,

தனியார் பால் நிறுவனங்கள் விற்பனை செய்யும் பாலில் கலப்படம் செய்யப்பட்டு உள்ளதாகவும், தரம் குறைந்துள்ளதாகவும், இந்த பாலை குடிக்கும் மக்களுக்கு உடல் உபாதைகள் ஏற்படுவதுடன், புற்றுநோய் உள்ளிட்ட பல்வேறு நோய்கள் தாக்கும் என்று தமிழக பால்வளத்துறை அமைச்சர் ராஜேந்திரபாலாஜி குற்றம்சாட்டினார்.

அமைச்சரின் இந்த ஆதாரம் இல்லாத குற்றச்சாட்டினால் தங்கள் நிறுவனங்களின் பால் உற்பத்தி பாதிக்கப்பட்டுள்ளதாகவும், தங்கள் நிறுவனங்களுக்கு எதிராக பேட்டி அளிக்க அமைச்சர் ராஜேந்திரபாலாஜிக்கு தடைவிதிக்க வேண்டும் என்றும், தங்கள் நிறுவனத்துக்கு தலா ரூ.1 கோடி நஷ்டஈடு வழங்கவும் உத்தரவிட வேண்டும் என்று 3 தனியார் பால் நிறுவனங்கள் சார்பில் சென்னை ஐகோர்ட்டில் வழக்கு தொடரப்பட்டது.

இந்த வழக்கை விசாரித்த தனி நீதிபதி, ‘ஆதாரம் இல்லாமல் தனியார் நிறுவன பாலில் கலப்படம் இருப்பதாக அமைச்சர் ராஜேந்திரபாலாஜி பேசக்கூடாது’ என தடை விதித்தார்.

மேலும் 3 மாதத்திற்கு ஒரு முறை பால் மாதிரியை சம்பந்தப்பட்ட நிறுவனமே, அரசால் அங்கீகரிக்கப்பட்ட ஆய்வகத்தில் ஆய்வு செய்து அதுதொடர்பான அறிக்கையை கோர்ட்டில் தாக்கல் செய்ய வேண்டும் என்றும் தனி நீதிபதி உத்தரவிட்டார்.

இந்த உத்தரவை எதிர்த்து, அமைச்சர் ராஜந்திரபாலாஜி சார்பில் ஐகோர்ட்டில் மேல்முறையீட்டு மனு தாக்கல் செய்யப்பட்டது.

அதில், ‘3 மாதத்திற்கு ஒரு முறை பால் மாதிரியை சம்பந்தப்பட்ட நிறுவனமே, ஆய்வு செய்து அறிக்கை தாக்கல் செய்யும்பட்சத்தில் உண்மை வெளிவராது. இந்த விவகாரத்தில் என்னை மிரட்ட வேண்டும் என்ற நோக்கில் மனுதாரர்கள் இந்த வழக்கை தொடர்ந்துள்ளனர். சம்பந்தப்பட்ட துறையின் அமைச்சர் என்ற முறையில் தனக்கு வந்த புகார்களின் அடிப்படையில்தான் கருத்து தெரிவித்தேன். பால் கலப்படம் குறித்து விழிப்புணர்வு ஏற்படுத்த வேண்டும் என ஏற்கனவே சுப்ரீம் கோர்ட்டு கூறியுள்ளது. எனவே அமைச்சர் என்ற முறையில் பொதுமக்களை பாதுகாக்க எனது கருத்துகளை கூறினேன். இந்த விவகாரத்தில் தனியார் பால் நிறுவனங்களின் பெயரை குறிப்பிட்டு நான் கருத்து சொல்லவில்லை. பொதுவாகத்தான் தெரிவித்தேன். தனியார் பால் நிறுவனங்கள் குறித்து பேசக்கூடாது என்று ஐகோர்ட்டு பிறப்பித்த உத்தரவானது, ஒரு குடிமகன் என்ற நிலையிலும், அமைச்சர் என்ற முறையிலும் எனது பேச்சுரிமையை பாதிக்கிறது. எனவே தனி நீதிபதியின் உத்தரவை ரத்து செய்ய வேண்டும்.

இவ்வாறு அவர் மனுவில் கூறி இருந்தார்.

இந்த மேல்முறையீட்டு மனுவை நீதிபதிகள் சுப்பையா, பொங்கியப்பன் ஆகியோர் விசாரித்தனர். இந்த வழக்கின் தீர்ப்பை மதுரை ஐகோர்ட்டில் நேற்று வழங்கினர். அதில், ‘‘அமைச்சரின் பேச்சால் வழக்கு தொடர்ந்த பால் நிறுவனங்களின் உற்பத்திக்கு எந்த பாதிப்பும் இல்லை என தெரியவருகிறது. எனவே தனி நீதிபதியின் தடை உத்தரவு ரத்து செய்யப்படுகிறது’’ என்று நீதிபதிகள் கூறியுள்ளனர்.