அரசு வழங்கிய 17 சதவீத சம்பள உயர்வில் திருப்தி இல்லை; விதான சவுதா ஊழியர்கள் சங்க தலைவர் பேட்டி

பெங்களூரு:

கா்நாடக அரசு வழங்கி இருக்கும் 17 சதவீத சம்பள உயர்வு திருப்தி அளிக்கவில்லை என்று விதான சவுதா ஊழியர்கள் சங்க தலைவர் குருசாமி கூறியுள்ளார்.

வேலை நிறுத்தம்

கர்நாடக அரசு ஊழியர்கள் சம்பள உயர்வு கோரி வேலை நிறுத்தத்தில் ஈடுபட்டனர். இதையடுத்து ஊழியர்களின் அடிப்படை சம்பளத்தில் 17 சதவீதத்தை உயர்த்துவதாக அரசு அறிவித்துள்ளது. அதற்கான உத்தரவும் பிறப்பிக்கப்பட்டுள்ளது. இதை ஏற்று அரசு ஊழியர்கள் தங்களின் வேலை நிறுத்தத்தை வாபஸ் பெற்றுள்ளனர். ஆனால் பெங்களூரு விதான சவுதா ஊழியர்கள் சங்க தலைவர் குருசாமி எதிர்ப்பு தெரிவித்துள்ளார். இதுகுறித்து அவர் கூறியதாவது:-

கர்நாடக அரசு 17 சதவீத சம்பள உயர்வு வழங்குவதாக அறிவித்துள்ளது. இதை கா்நாடக அரசு ஊழியர்கள் சங்க தலைவர் ஷடக்சரி ஏற்று கொண்டுள்ளார். அவர் ஒருதலைபட்சமாக இந்த முடிவை எடுத்துள்ளார். இடைக்கால நிவாரணமாக 40 சதவீத சம்பளம் உயர்த்த வேண்டும் என்று நாங்கள் கோரினோம். ஆனால் அரசு 17 சதவீத உயர்வு மட்டுமே வழங்குவதாக கூறியுள்ளது. இதையும் வருகிற ஏப்ரல் மாதம் 1-ந் தேதி முதல் அமல்படுத்துவதாக அரசு கூறியுள்ளது. இதை முன்தேதியிட்டு அமல்படுத்தி இருக்க வேண்டும்.

திருப்தி அளிக்கவில்லை

கர்நாடக அரசின் இடைக்கால சம்பள உயர்வு எனக்கு திருப்தி அளிக்கவில்லை. குறைந்தபட்சம் 25 சதவீதமாவது உயர்த்தி இருக்க வேண்டும். கர்நாடக அரசு வேலை நிறுத்தத்தை முடக்க வேண்டும் என்ற நோக்கத்தில் கண்துடைப்புக்காக 17 சதவீத சம்பள உயர்வு வழங்கியுள்ளது. எங்களின் முக்கியமான கோரிக்கை, புதிய ஓய்வூதிய திட்டத்தை ரத்து செய்துவிட்டு, பழைய ஓய்வூதிய திட்டத்தை அமல்படுத்த வேண்டும் என்பது தான்.

அரசு ஒரு குழுவை அமைப்பதாக கூறியுள்ளது. ஏற்கனவே அரசு அமைத்த குழு என்ன ஆனது?. அரசின் அழுத்தத்திற்கு பணிந்து ஷடக்சரி ஒருதலைபட்சமாக முடிவு எடுத்துள்ளார். வேலை நிறுத்த போராட்டத்தை வாபஸ் பெறுவது குறித்து எங்களுடன் கலந்து ஆலோசிக்கவில்லை.

இவ்வாறு குருசாமி கூறினார்.