உலகக்கோப்பை கிரிக்கெட்: இந்தியா-பாகிஸ்தான் ஆட்டத்திற்கான டிக்கெட்டுகள் இன்று விற்பனை

சென்னை,

கிரிக்கெட் ரசிகர்கள் ஆவலுடன் எதிர்பார்க்கும் 13-வது உலகக்கோப்பை கிரிக்கெட் தொடர்(50 ஓவர்) அக்டோபர் 5-ந்தேதி முதல் நவம்பர் 19-ந்தேதி வரை இந்தியாவின் 10 நகரங்களில் நடைபெறுகிறது. ஆமதாபாத்தில் உள்ள நரேந்திர மோடி ஸ்டேடியத்தில் நடக்கும் முதல் லீக் ஆட்டத்தில் நடப்பு சாம்பியன் இங்கிலாந்து-நியூசிலாந்து அணிகள் பலப்பரீட்சை நடத்துகின்றன.

அக்டோபர் 8-ந்தேதி சென்னை சேப்பாக்கம் மைதானத்தில் நடக்கும் போட்டியில் இந்தியா-ஆஸ்திரேலியா அணிகள் மோத உள்ளன. தொடர்ந்து அக்டோபர் 11-ந்தேதி டெல்லி அருண் ஜெட்லி மைதானத்தில் இந்தியா-ஆப்கானிஸ்தான் ஆட்டமும், அக்டோபர் 19-ந்தேதி புனே எம்.சி.ஏ. மைதானத்தில் இந்தியா-வங்காளதேசம் இடையிலான ஆட்டமும் நடைபெறுகிறது.

இந்த 3 போட்டிகளுக்கான டிக்கெட் விற்பனை ஆகஸ்ட் கடந்த 31-ந்தேதி இரவு 8 மணிக்கு தொடங்கியது. 'புக் மை ஷோ' இணையதளம் மூலம் ஆன்லைனில் டிக்கெட்டுகள் விற்பனை செய்யப்பட்ட நிலையில், தொடங்கிய சிறிது நேரத்தில் டிக்கெட்டுகள் அனைத்தும் விற்றுத் தீர்ந்தன.

தொடர்ந்து தர்மசாலாவில் அக்டோபர் 22-ந்தேதி நடக்கும் இந்தியா-நியூசிலாந்து ஆட்டம், லக்னோவில் அக்டோபர் 29-ந்தேதி நடக்கும் இந்தியா-இங்கிலாந்து ஆட்டம் மற்றும் மும்பையில் நவம்பர் 2-ந்தேதி நடக்கும் இந்தியா-இலங்கை இடையிலான ஆட்டம் ஆகிய 3 போட்டிகளுக்கு செப்டம்பர் 1-ந்தேதி டிக்கெட் விற்பனை நடைபெற்றது.

இதையடுத்து கொல்கத்தாவில் நவம்பர் 5-ந்தேதி நடக்கும் இந்தியா-தென் ஆப்பிரிக்கா ஆட்டம், பெங்களுருவில் நவம்பர் 12-ந்தேதி நடக்கும் இந்தியா-நெதர்லாந்து ஆட்டத்திற்கான டிக்கெட்டுகள் செப்டம்பர் 2-ந்தேதி(நேற்று) விற்பனையாகின.

இந்த நிலையில் மிகப்பெரிய எதிர்பார்ப்புடன் ஆமதாபாத்தில் அக்டோபர் 14-ந்தேதி நடைபெற உள்ள இந்தியா-பாகிஸ்தான் ஆட்டத்துக்கான டிக்கெட்டுகள் செப்டம்பர் 3-ந்தேதி(இன்று) விற்பனை செய்யப்பட உள்ளன. 'புக் மை ஷோ' இணையதளம் மூலம் ஆன்லைனில் டிக்கெட்டுகள் விற்பனை செய்யப்பட உள்ளது குறிப்பிடத்தக்கது.