கோவை மாவட்டம் வால்பாறை தொகுதி அதிமுக எம்.எல்.ஏ. அமுல் கந்தசாமி (வயது 60). கடந்த சில நாட்களாக உடல்நலக்குறைவால் பாதிக்கப்பட்ட கந்தசாமி கோவையில் உள்ள தனியார் மருத்துவமனையில் சிகிச்சை பெற்று வந்தார். இதனிடையே, எம்.எல்.ஏ. கந்தசாமி சிகிச்சை பலனின்றி இன்று உயிரிழந்தார். அவரது மறைவிற்கு அதிமுக பொதுச்செயலாளர் எடப்பாடி பழனிசாமி உள்பட பல்வேறு அரசியல் கட்சியினர் இரங்கல் தெரிவித்து வருகின்றனர்.

இந்நிலையில், அதிமுக எம்.எல்.ஏ. அமுல் கந்தசாமி மறைவிற்கு முதல்-அமைச்சர் மு.க.ஸ்டாலின் இரங்கல் தெரிவித்துள்ளார் . இது தொடர்பாக அவர் வெளியிட்ட இரங்கல் செய்தியில்,

வால்பாறை தொகுதி சட்டமன்ற உறுப்பினர் திரு.அமுல் கந்தசாமி அவர்கள் மறைந்த செய்தியறிந்து மிகவும் வருத்தமடைந்தேன். அன்னாரை இழந்து வாடும் அவரது குடும்பத்தினருக்கும், வால்பாறை தொகுதி மக்களுக்கும், அதிமுக கட்சியினருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்' என தெரிவிக்கப்பட்டுள்ளது.