இளம் இந்திய வீரர்களான ருச்சித் அஹிர், சன்விர் சிங், கமலேஷ் நாகர்கோட்டி, தனுஷ் கோட்டியான் ஆகியோரை யாரும் வாங்கவில்லை. 

அடிப்படை விலை ரூ.30 லட்சத்தில் இடம்பெற்றிருந்த இந்திய இளம் உள்ளூர் ஆல் ரவுண்டரான பிரஷாந்த் வீரை ஏலத்தில் எடுக்க சென்னை சூப்பர் கிங்ஸ் - சன்ரைசர்ஸ் ஐதராபாத் அணிகள் மாறி மாறி மல்லுக்கட்டின. இதனால் இவரது விலை ஜெட் வேகத்தில் உயர்ந்து கொண்டே சென்றது. இறுதியில் அவரை ரூ.14.20 கோடி என்ற மலைக்க வைக்கும் தொகைக்கு சென்னை சூப்பர் கிங்ஸ் வாங்கியுள்ளது. 

இதன் மூலம் ஐ.பி.எல். வரலாற்றில் அதிக தொகைக்கு ஏலம் போன அன்கேப்டு வீரர் என்ற சாதனையை பிரஷாந்த் வீர் படைத்துள்ளார். 

ராஜ்வர்தன் ஹங்கர்கேகர், மஹிபால் லோமரர், எதன் டாம் ஆகிய அன்கேப்டு வீரர்களை எந்த அணியும் வாங்க முன்வரவில்லை. 

தமிழக வீரரான விஷய் சங்கரை எந்த அணியும் ஏலத்தில் வாங்கவில்லை. 

அன்கேப்டு இந்திய வேகப்பந்து வீச்சு ஆல் ரவுண்டரான ஆகிப் சலாமை ஏலத்தில் எடுக்க பெங்களூரு மற்றும் டெல்லி அணிகளுக்கு இடையே கடும் போட்டி நிலவியது. ஒரு கட்டத்தில் பெங்களூரு அணி போட்டியிலிருந்து விலகியது. இதனையடுத்து சன்ரைசர்ஸ் ஐதராபாத் அணி கோதாவில் குதித்தது.

இறுதியில் ரூ. 30 லட்சம் என்ற அடிப்படை விலையில் இடம்பெற்றிருந்த அவரை ரூ. 8.40 கோடி என்ற பிரமாண்ட தொகைக்கு டெல்லி கேப்பிடல்ஸ் வாங்கியுள்ளது. 

ஆச்சரியமளிக்கும் வகையில் சுழற்பந்து வீச்சாளர்களான முஜீப் உர் ரஹ்மான், தீக்‌ஷனா, ராகுல் சஹார் ஆகியோரை வாங்க எந்த அணியும் ஆர்வம் காட்டவில்லை. 

தென் ஆப்பிரிக்க முன்னணி வேகப்பந்து வீச்சாளரான அன்ரிச் நார்ட்ஜேவை அடிப்படை விலையான ரூ. 2 கோடிக்கு லக்னோ சூப்பர் ஜெயண்ட்ஸ் வாங்கியுள்ளது. 

உள்ளூர் வீரர்களை வாங்க ஆர்வம் காட்டாத அணிகள்:

இந்திய அன்கேப்டு வீரர்களான அதர்வா தைடே, அன்மோல்ப்ரீத் சிங், அபினவ் தேஜ்ரானா, அபினம் மனோஹர், யாஷ் தூள், ஆர்யா தேசாய் ஆகியோரை எந்த அணியும் வாங்கவில்லை.

வெஸ்ட் இண்டீஸ் வீரரான அகேல் ஹோசினை அடிப்படை விலையான ரூ.2 கோடிக்கு சென்னை சூப்பர் கிங்ஸ் அணி வாங்கியுள்ளது. இந்த ஏலத்தில் சென்னை அணி வாங்கிய முதல் வீரர் இவர் என்பது குறிப்பிடத்த்க்கது.

இந்திய சுழற்பந்து வீச்சாளரான ரவி பிஷ்னோயை வாங்க சிஎஸ்கே மற்றும் ராஜஸ்தான் ராயல்ஸ் அணிகள் மாறி மாறி போட்டி போட்டன. ஒரு கட்டத்தில் சிஎஸ்கே அணி போட்டியிலிருந்து வெளியேறியது. இறுதியில் ரூ.7.20 கோடிக்கு ராஜஸ்தான் ராயல்ஸ் வாங்கியது.