தனுஷ் இயக்கும் படத்தில் செல்வராகவன்?

டைரக்டர் செல்வராகவன் நடிகரான பிறகு நிறைய பட வாய்ப்புகள் குவிகின்றன. ஏற்கனவே சாணிகாகிதம், பகாசுரன், பர்ஹானா ஆகிய படங்களில் அவரது நடிப்பு பேசப்பட்டது. இந்த நிலையில் தனது தம்பி தனுஷ் இயக்கும் படத்தில் நடிக்கவும் செல்வராகவனிடன் பேச்சுவார்த்தை நடப்பதாக தகவல் வெளியாகி உள்ளது.

செல்வராகவன் இயக்கத்தில் நடித்த காதல் கொண்டேன் படம்தான் தனுசுக்கு திருப்புமுனையாக அமைந்து பட வாய்ப்புகள் குவிந்தன. தொடர்ந்து செல்வராகவன் இயக்கிய புதுப்பேட்டை, மயக்கம் என்ன, நானே வருவேன் ஆகிய படங்களிலும் தனுஷ் நடித்து இருந்தார்.

தற்போது மாதேஸ்வரன் இயக்கத்தில் நடிக்கும் தனுஷ் அடுத்து தனது 50-வது படத்தை இயக்கி அவரே கதாநாயகனாகவும் நடிக்க உள்ளார். இந்த படத்தில்தான் செல்வராகவனை நடிக்க வைக்க முடிவு செய்து இருப்பதாக கூறப்படுகிறது.

இதில் செல்வராகவன் வில்லன் வேடத்தில் நடிக்கிறாரா? அல்லது குணசித்திர கதாபாத்திரத்தில் வருகிறாரா? என்பது உறுதியாக தெரியவில்லை. இந்த படத்தில் நடிக்கும் நடிகர்-நடிகைகள் விவரம் விரைவில் அறிவிக்கப்பட உள்ளது.