சென்னை - சேலம் இடையே மீண்டும் விமான சேவை தொடக்கம்

சென்னை,

சேலம் காமலாபுரம் விமான நிலையத்தில் இருந்து வெளியூர்களுக்கு விமானம் இயக்கப்பட்டு வந்தது. அதன்பிறகு பல்வேறு காரணங்களால் விமான சேவை கடந்த 2 ஆண்டுகளுக்கு முன்பு நிறுத்தப்பட்டது. இந்தநிலையில் சேலத்தில் இருந்து பெங்களூரு, கொச்சின், ஐதராபாத், சென்னை போன்ற நகரங்களுக்கு விமான சேவை தொடங்க 2 நிறுவனங்கள் முன்வந்தன.

அதன்படி, கடந்த 16-ம் தேதியில் இருந்து விமான சேவை தொடங்கப்பட்டது. முதலில் பெங்களூரு-கொச்சிக்கு இடையே விமானம் இயக்கப்பட்டது.

இந்நிலையில் இன்று சென்னைக்கு விமான சேவை தொடங்கப்படவுள்ளது. கடந்த 2020ம் ஆண்டு கொரோனா பாதிப்பு காரணமாக இந்த சேவை நிறுத்தப்பட்டிருந்தது. இந்நிலையில் இண்டிகோ ஏர்லைன்ஸ் நிறுவனம் தினசரி விமான சேவையை தொடங்க முன்வந்தது.

இதனால் சென்னை - சேலம் இடையே மூன்றரை ஆண்டுகளுக்கு பிறகு இன்று மீண்டும் விமான சேவை தொடங்கப்படவுள்ளது. சென்னையில் இருந்து காலை 11.20க்கு புறப்படும் விமானம் பகல் 12.30க்கு சேலம் சென்றடையும் என தகவல் வெளியாகியுள்ளது.