சீனா மாஸ்டர்ஸ் பேட்மிண்டன் இறுதிப்போட்டி: சாத்விக்- சிராக் ஜோடி போராடி தோல்வி

ஷின்சென்,

சீனா மாஸ்டர்ஸ் பேட்மிண்டன் போட்டி அங்குள்ள ஷின்சென் நகரில் கடந்த ஒரு வாரமாக நடந்து வந்தது. இதில் ஆண்கள் இரட்டையர் பிரிவில் நேற்று நடந்த மகுடத்துக்கான இறுதி ஆட்டத்தில் இந்தியாவின் சாத்விக் சாய்ராஜ் ரங்கிரெட்டி- சிராக் ஷெட்டி கூட்டணி, 'நம்பர் ஒன்' ஜோடியான சீனாவின் லியாங் வெய் கெங்- வாங் சாங் இணையை எதிர்கொண்டது.

அனல் பறந்த போட்டியின் முதல் செட்டை சீன ஜோடியும், 2-வது செட்டை இந்திய இணையும் கைப்பற்றியது. 3-வது செட்டில் தொடக்கத்தில் லியாங்- வாங் கூட்டணியின் கை ஓங்கியது. ஒரு கட்டத்தில் 20-13 என்ற கணக்கில் வெற்றியின் விளிம்புக்கு வந்தனர். அதன் பிறகு சரிவில் இருந்து ஆக்ரோஷமாக எழுச்சி பெற்ற சாத்விக்- சிராக் தொடர்ச்சியாக 6 புள்ளிகளை சேகரித்து 19-20 வரை நெருங்கி வந்தனர்.

இதனால் எதிர் ஜோடி பதற்றத்திற்குள்ளான நிலையில் சமன் செய்வதற்கு வாய்ப்புக்குரிய புள்ளியில் பந்தை இந்திய வீரர்கள் வலையில் அடித்து வெற்றியை கோட்டை விட்டனர். 1 மணி 11 நிமிடங்கள் நீடித்த ஆட்டத்தின் முடிவில் சாத்விக்- சிராக் ஷெட்டி ஜோடி 19-21, 21-18, 19-21 என்ற செட் கணக்கில் போராடி தோல்வியை தழுவியது. இந்த சீசனில் 6 இறுதிப்போட்டியில் ஆடியுள்ள சாத்விக்- சிராக் அதில் சந்தித்த முதல் தோல்வி இதுதான்.