டெல்லி,

இங்கிலாந்து பிரதமராக கீர் ஸ்டார்மர் செயல்பட்டு வருகிறார். அவர் கடந்த ஆண்டு இங்கிலாந்து பிரதமராக பொறுப்பேற்றார். இதனிடையே, 2 நாட்கள் அரசு முறை பயணமாக இங்கிலாந்து பிதமர் கீர் ஸ்டார்மர் இந்தியா வந்துள்ளார். ரதமராக பதவியேற்றப்பின் அவர் மேற்கொள்ளும் முதல் இந்திய பயணம் இதுவாகும்.

மராட்டிய தலைநகர் மும்பை வந்த ஸ்டார்மரை அதிகாரிகள் வரவேற்றனர். அவருடன் இங்கிலாந்து தொழிலதிபர்கள், பல்கலைக்கழக துணை வேந்தர்கள், தொழில் நிறுவனங்களின் தலைவர்கள் என 125 பேர் கொண்ட குழுவும் இந்தியா வந்துள்ளது.

இந்நிலையில், இந்தியா வந்துள்ள கீர் ஸ்டார்மரை பிரதமர் மோடி வரவேற்றுள்ளார். இது தொடர்பாக பிரதமர் மோடி வெளியிட்ட எக்ஸ் பதிவில், மிகப்பெரிய வர்த்தக குழுவுடன் இந்தியாவுக்கு முதல்முறையாக வந்துள்ள இங்கிலாந்து பிரதமர் கீர் ஸ்டார்மரை வரவேற்கிறேன். ஒருங்கிணைந்த, வலிமையான எதிர்கால வளர்ச்சி குறித்து ஆலோசிக்க நாளை நடைபெறும் சந்திப்பை ஆவலுடன் எதிர்பார்க்கிறேன்’ என தெரிவித்துள்ளார்.

கீர் ஸ்டார்மரை பிரதமர் மோடி நாளை சந்திக்கிறார். மும்பையில் நாளை நடைபெறும் 6வது குளோபல் பின்டெக் நிகழ்ச்சியில் கீர் ஸ்டார்மரும், பிரதமர் மோடியும் பங்கேற்கின்றனர். இந்த நிகழ்ச்சிக்குபின் இருநாட்டு உறவு, வர்த்தகம் உள்பட பல்வேறு விவகாரங்கள் குறித்து இருநாட்டு தலைவர்களும் ஆலோசிக்க உள்ளனர் என்பது குறிப்பிடத்தக்கது.