மான்செஸ்டர்,

சுப்மன் கில் தலைமையிலான இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் விளையாடி வருகிறது. இதில் நடைபெற்ற முதல் 3 போட்டிகளின் முடிவில் இங்கிலாந்து தொடரில் 2-1 என்ற கணக்கில் முன்னிலையில் இருந்தது.

இதனையடுத்து இவ்விரு அணிகள் இடையிலான 4-வது போட்டி மான்செஸ்டரில் நடைபெற்றது. இந்த போட்டி டிராவில் முடிந்தது. இதனால் இப்போதும் 5 போட்டிகள் கொண்ட இந்த தொடரில் இங்கிலாந்து அணி 2-1 என்ற கணக்கில் முன்னிலை வகிக்கிறது. இவ்விரு அணிகள் இடையிலான 5-வது மற்றும் கடைசி டெஸ்ட் போட்டி லண்டன் ஓவல் மைதானத்தில் வருகிற 31-ந் தேதி தொடங்குகிறது.

முன்னதாக மான்செஸ்டரில் நடைபெற்ற 4-வது டெஸ்ட் போட்டியின் முதல் நாள் ஆட்டத்தின்போது இந்திய விக்கெட் கீப்பர் ரிஷப் பண்ட் காலில் ஏற்பட்ட காயம் காரணமாக பாதியில் வெளியேறினார். ஸ்கேன் செய்து பார்த்ததில் அவருக்கு காலில் எலும்பு முறிவு ஏற்பட்டுள்ளது.

இருப்பினும் 2-வது நாளில் இந்திய அணி விக்கெட்டுகளை இழந்தபோது வலியை பொருட்படுத்தாமல் மீண்டும் களத்திற்கு வந்து அரைசதம் அடித்து அசத்தினார். இதனால் ரிஷப் பண்டை பல முன்னாள் வீரர்கள் பாராட்டினர்.

இந்நிலையில் நாடு எப்போதும் ரிஷப் பண்டை நினைத்து பெருமைப்படும் என்று இந்திய அணியின் தலைமை பயிற்சியாளரான கவுதம் கம்பீர் புகழாரம் சூட்டியுள்ளார்.

இது குறித்து பேசிய அவர் கூறுகையில், "ரிஷப் பண்ட் நாட்டுக்காக என்ன செய்தார் என்பதன் அடிப்படையிலேயே இந்த இந்திய அணி கட்டமைக்கப்பட்டுள்ளது. பொதுவாக தனிநபர்களைப் பற்றி பேசுவதை நான் வெறுக்கிறேன். ஒரு குழு விளையாட்டில் தனிநபர்களைப் பற்றி நான் ஒருபோதும் பேசியதில்லை. ஆனால் இன்று ரிஷப் பண்டை பற்றி பேசுகிறேன். நீங்கள் (பண்ட்) இந்த டிரஸ்ஸிங் அறையை மட்டுமல்ல, அடுத்த தலைமுறையையும் ஊக்கப்படுத்தியுள்ளீர்கள். இதுதான் நீங்கள் செய்திருக்கிறீர்கள். அது உங்களுக்காகவும் இந்த டிரஸ்ஸிங் அறையில் உள்ள அனைவருக்காகவும் நீங்கள் உருவாக்கிய மரபு. மேலும் நாடு... எப்போதும்... எப்போதும் உங்களைப் பற்றி பெருமைப்படும்" என்று கூறினார்.