போரில் பலியானோர் எண்ணிக்கை 8 ஆயிரத்தை தாண்டி உள்ளது - ஹமாஸ் சுகாதார அமைச்சகம் தகவல்

அக்டோபர் 7 ஆம் தேதி இஸ்ரேலுடனான போர் தொடங்கியதில் இருந்து 8,000க்கும் அதிகமானோர் பாலஸ்தீனப் பகுதியில் கொல்லப்பட்டதாக ஹமாஸ் ஆளும் காசாவில் உள்ள சுகாதார அமைச்சகம் இன்று அதிகாலை தெரிவித்தது.

இதன்படி இஸ்ரேல் தாக்குதல் காரணமாக காசாவில் இறப்பு எண்ணிக்கை 8 ஆயிரத்தை கடந்துள்ளது என்றும், அவர்களில் பாதி குழந்தைகள் என்றும் அந்த அமைச்சகம் தெரிவித்துள்ளது. முன்னதாக நேற்று அதிகாலை வெளியிடப்பட்ட கடைசி உயிரிழப்பு எண்ணிக்கையில் 7,703 ஆக இருந்ததாக தெரிவிக்கப்பட்டிருந்தது. 

இரண்டாம் கட்ட போர் தொடங்கியுள்ளது: இஸ்ரேல் பிரதமர் பெஞ்சமின் நெதன்யாகு

ஹமாஸ் அமைப்பினருக்கும், இஸ்ரேல் ராணுவத்திற்கும் இடையேயான போர் 23-வது நாளாக தொடர்ந்து வருகிறது. இதனால் போர் நாளுக்கு நாள் தீவிரம் அடைந்து வருகிறது. போரில் இருதரப்பிலும் ஏற்பட்ட உயிரிழப்புகளின் எண்ணிக்கை 10 ஆயிரத்தை நெருங்கியுள்ளது.

இதனிடையே போரில் அப்பாவி பொதுமக்கள், குறிப்பாக பெண்களும், சிறுவர்களும் அதிகளவில் பாதிக்கப்படுவதால் போரை உடனடியாக நிறுத்த வேண்டுமென ஐ.நா.வும், உலக நாடுகள் பலவும் தொடர்ந்து வலியுறுத்தி வருகின்றன. ஆனால் போர் நிறுத்தத்துக்கான அழைப்பை இஸ்ரேல் தொடர்ந்து நிராகரித்து வருகிறது.

இந்த நிலையில் ஹமாஸ் குழுவிற்கு எதிரான இரண்டாம் கட்ட போர் தொடங்கியுள்ளதாக இஸ்ரேல் பிரதமர் பெஞ்சமின் நெதன்யாகு தெரிவித்துள்ளார். மேலும் எதிரிகளை தோற்கடிப்பதும் நமது இருப்புக்கு உத்தரவாதம் அளிப்பதும் எங்களுக்கு ஒரு முக்கிய குறிக்கோள்” என்று அவர் கூறினார்.

காசா போர் 'நீண்ட மற்றும் கடினமானதாக' இருக்கும் - இஸ்ரேலின் பிரதமர் நெதன்யாகு

மத்திய கிழக்கு நாடுகளான இஸ்ரேல்-பாலஸ்தீனம் இடையே நீண்ட நெடுங்காலமாக மோதல் போக்கு நீடித்து வருகிறது. இதில் பாலஸ்தீனத்தின் காசா பகுதியை ஆட்சி செய்து வரும் ஹமாஸ் அமைப்பு இஸ்ரேலுடன் ஆயுத மோதலில் ஈடுபட்டு வருகிறது.

அந்த வகையில் கடந்த 7-ந் தேதி ஹமாஸ் அமைப்பினர் இஸ்ரேலின் தெற்கு நகரங்கள் மீது சரமாரியாக ராக்கெட் குண்டுகளை வீசி தாக்கினர். சுமார் 20 நிமிடங்களில் 5 ஆயிரத்துக்கும் மேற்பட்ட ராக்கெட்டுகள் இஸ்ரேல் நகரங்களை தாக்கின.

அதை தொடர்ந்து நூற்றுக்கணக்கான ஹமாஸ் அமைப்பினர் இஸ்ரேலின் எல்லையோர நகரங்களுக்குள் ஊடுருவினர். அவர்கள் கண்ணில் பட்டவர்களையெல்லாம் குருவியை சுடுவதுபோல சுட்டுக்கொன்றனர்.

அதோடு நிற்காமல் பெண்கள், சிறுவர்கள் என 220-க்கும் அதிகமானோரை சிறைபிடித்து, காசா பகுதிக்கு கொண்டு சென்றனர். முன்னெப்போதும் இல்லாத வகையில் ஹமாஸ் அமைப்பினர் நடத்திய இந்த கொடூர தாக்கு தலில் இஸ்ரேல் நிலைகுலைந்தது.

இந்நிலையில் காசாவில் தரைவழித் தாக்குதல் முடுக்கிவிடப்படுவதால் போர் நீண்டதாகவும் கடினமாகவும் இருக்கும் என பிரதமர் நெதன்யாகு எச்சரிக்கை விடுத்துள்ளார்.

இதுதொடர்பாக டெல் அவிவில் ஒரு செய்தியாளர் கூட்டத்தில் பேசிய நெதன்யாகு, “காசா மீதான போர் "நீண்ட மற்றும் கடினமானதாக" இருக்கும். இஸ்ரேல் தனது தாக்குதலை மையமாக வைத்துள்ள வடக்கு காசா பகுதியை பாலஸ்தீனிய குடிமக்கள் காலி செய்யவேண்டும் . ஹமாஸ் பிடியில் உள்ள 200க்கும் மேற்பட்ட பணயக்கைதிகளை மீட்க அனைத்து முயற்சிகளும் மேற்கொள்ளப்பட்டு வருகின்றன. இது போரின் இரண்டாவது கட்டமாகும், அதன் இலக்குகள் தெளிவாக உள்ளன. ஹமாஸின் ஆட்சி, இராணுவ திறன்களை அழிப்பது மற்றும் பணயக்கைதிகளை வீட்டிற்கு கொண்டு வருவது” என்று அவர் கூறினார்.