மம்தா பானர்ஜி குறித்து அவதூறு கருத்து - பா.ஜ.க. வேட்பாளருக்கு தேர்தல் ஆணையம் நோட்டீஸ்

கொல்கத்தா,

முன்னாள் ஐகோர்ட்டு நீதிபதியான அபிஜித் கங்கோபாத்யாய், நாடாளுமன்ற மக்களவை தேர்தலில் பா.ஜ.க. சார்பில் மேற்கு வங்காள மாநிலத்தில் உள்ள தம்லுக் தொகுதியில் போட்டியிடுகிறார். இந்த தொகுதிக்கு வரும் 25-ந்தேதி வாக்குப்பதிவு நடைபெற உள்ளது.

இதனிடையே கடந்த 15-ந்தேதி ஹல்தியா பகுதியில் நடைபெற்ற பா.ஜ.க. தேர்தல் பிரசார பொதுக்கூட்டத்தில் பேசிய அபிஜித் கங்கோபாத்யாய், மேற்கு வங்காள முதல்-மந்திரி மம்தா பானர்ஜி குறித்து தரக்குறைவான முறையில், மிகவும் மோசமான விமர்சனத்தை முன்வைத்ததாக கூறி திரிணாமுல் காங்கிரஸ் கட்சியினர் தேர்தல் ஆணையத்தில் புகார் அளித்தனர்.

இந்நிலையில், இந்த புகார் தொடர்பாக பா.ஜ.க. வேட்பாளர் அபிஜித் கங்கோபாத்யாய் வரும் 20-ந்தேதி மாலை 5 மணிக்குள் விளக்கமளிக்க வேண்டும் என தேர்தல் ஆணையம் அவருக்கு நோட்டீஸ் அனுப்பியுள்ளது. அதில், அபிஜித் கங்கோபாத்யாய் பேசிய கருத்துக்கள் முறையற்ற, கண்ணியமற்ற வகையிலும், தேர்தல் நடத்தை விதிகளை மீறும் வகையிலும் இருப்பது கண்டறியப்பட்டுள்ளதாக தேர்தல் ஆணையம் கூறியிருப்பது குறிப்பிடத்தக்கது.